Tindero’g saging nagsideline og shabu tiklo

CEBU, Philippines - Nasikop  sa mga tinugyanan  sa Provincial Anti-Illegal Drugs Special Operation Task Group (PAIDSOTG) ang  usa ka tindera  og  saging  kinsa nanayidline  sa pagpaninda  og shabu  didto  sa dalan Beatriz Durano Barangay Poblacion,  syudad sa Danao sa miaging gabii. Ang  suspetsado mao  si Manuel alyas Mawi Taneo, 27, usa ka mamaligyaay og saging kilid sa simbahan sa maong lugar.

Ang  mga  operatiba sa PAIDSOTG milusad og   buybust operation sa maong  lugar  human sila  makadawat  og impormasyon kalabot sa sideline  ni  Taneo   sa pagpaninda og shabu  samtang  namaligya  usab  og  saging.    

Una nila ilusad  ang  maong  buybust, gipanid-an  una  nila  ang lihok   sa suspetsado  ug  dihang  may ebidensiya  na  sila gilusad  dayon  nila ang   buybust

Ang maong  operasyon  ilang  giatol  nga nanglimpyo ang biktima sa iyang tindahan, diin  usa  sa  mga  operatiba  miduol  sa suspek ug nagpaka-aron ingnon  nga mopalit  og  drugas  ug abtik kuno   kaayong gitunol  niini  ang  usa ka paketing  shabu.

Dihang  nasabtan  ni Taneo  nga posasan  siya, misuway  kini  og kisi-kisi  apan  gumikan  sa kaabtik  sa  mga polis, dali kaayong  nasirado  ang  posas  sa duha  ka pulso  sa suspek  ug  wala  na  kini  makaikyas.

Gawas  sa iyang gitunol  nga  usa  ka  putos, nasakpan  pa  sa kapolisan  ang  dugang  pang 12 ka pakete sa gituohang shabu  nga gihiposan sa suspek sa iyang tindahan.

Nasayran  usab  sa kapolisan  nga  matag semana mahalinan  ang maong suspek  og shabu  nga  dili momenus P100 mil  sanglit  mao  na  kuno  kini  ang  negosyo  sa tibuok  pamilya  niini.

Kasong kalapasan sa Section 5 and 11 sa RA 9165 kon Dangerous Drugs Act of 2002 maoy giandam nga ipasaka batok kang Taneo.  (BANAT NEWS)