NCRPO nagre-recruit ng mga bagong pulis

MANILA, Philippines - Nangangailangan ngayon ng mga bagong pulis ang pamunuan ng National Capital Regional Police Office (NCRPO) para ipalit sa mga  pulis na ipapatapon sa Basilan.

Ipinahayag ito ni NCRPO Director Oscar Albayalde mismo sa harap mismo ng 311 pulis,  na nakatakdang ipatapon sa Mindanao para sa patuloy na internal cleansing sa pambansang pulisya.

Nabatid sa NCRPO, taun-taon ay nagrerecruit sila ng  mga bagong pulis at tinatayang aabot  sa 10,000 ang kanilang kinukuha at pinakamarami ang dinadala sa Metro Manila.

Ayon  kay Albayalde, magsisimula ang recruitment ng NCRPO sa darating na buwan ng Abril at Mayo ng taong kasalukuyan.

Sa mga nais aniyang mag-apply, maaring magsumite ng kanilang application sa NCRPO Headquarters sa Camp Bagong Diwa, Bicutan, Taguig City.

Mariing paalala lamang ng NCRPO director sa mga applicant, na  dapat aniyang isapuso, sinsero at huwag gawing negosyo ang pagpupulis upang hindi aniya masangkot ang mga ito sa katiwalian.