Reklamo batok Emit paaksiyonan na ni Bucao

CEBU, Philippines - Naglaum si City of Talisay Vice Mayor Alan Bucao nga makapagawas na sila og desisyon kalabot sa reklamo batok sa ilang kaubang konsehal nga si Doroteo Emit human unya sa Semana Santa.

Kahinumduman nga si Konsehal Emit, gipetisyonan sa Federation of Talisay Urban Dwellers Association (FETCUDA) kay nawagtangan na sila og pagsalig niini ingon man kini ang nagdala og kagubot sa ilang grupo. Nunot niini, ilang gihangyo ang konseho nga tangtangon gikan sa konsehal ang komitiba sa urban poor.

Ang maong reklamo gipadangat kini niadto pang buwan sa Pebrero apan hangtud karon wala pa makasumiter og committee report si Konsehal Gail Restauro, kinsa maoy chairman sa Committee on Laws.

Matud ni Bucao daghan na siya’g tawag ug mensahe nga nadawat kun nganong dili sila katarog kang Emit.

Iyang gipasabot nga daghang panghitabo ang ilang giatubang sa konseho mao nga siya nagtuo nga mao kini ang hinungdan nga nalangan si Restauro sa pagsumiter sa iyang committee report.

Dugang sa bise mayor nga ilang gisubay sa proseso ang tanan ug iyang giklaro nga kanunay niya’ng gipahinumduman si Restauro kabahin niini.Sa nasayran, ang grupo sa mga chapter president, niduol sab kang Restauro aron ipadayag ang ilang pagsuporta kang Emit. - /DILT) (BANAT NEWS)