Pacquiao-Khan fight lumalakas

MANILA, Philippines - Malinaw na may iba’t ibang agenda ang Team Pacquiao.

Inihayag kahapon ni Filipino boxing superstar Manny Pacquiao sa kanyang Twitter account ang nangyayaring negosasyon sa kanilang mga kampo ni dating light welterweight king Amir Khan ng Great Britain.

“My team and I are in negotiations with Amir Khan for our next fight. Further announcement coming soon,” sabi ni Pacquiao (59-6-2, 38 KOs) sa kanyang 114,000 followers sa Twitter.

Isang grupo ng negosyante sa United Arab Emirates ang nakikipag-usap kay Michael Koncz, ang Canadian adviser ni Pacquiao, na gawin ang naturang laban sa Dubai at inalok si ‘Pacman’ ng $38 milyon para sagupain si Khan (31-4-0, 19 KOs).

Taliwas ito sa naunang pahayag ni Bob Arum ng Top Rank Promotions na si Australian contender Jeff Horn (16-0-1, 11 KOs) ang lalabanan ng 38-anyos na Filipino world eight-division champion.

“The Australian deal is not going to happen now, because Manny is trying to get a fight done in the United Arab Emirates, and the people there favor him fighting Amir Khan,” wika naman ni Arum.

Nauna nang ibinunyag ni Arum na nagkasundo na sila ng Duco Events, isang New Zealand promotional company na humahawak kay Horn, para sa pagdedepensa ni Pacquiao ng kanyang World Boxing Organization welterweight crown sa Abril 23 sa Brisbane, Australia. (RC)