Curfew sa Kalag-kalag

Attention sa mga ginikanan ug ilabi na sa mga menor de edad sa dakbayan sa Lapu-Lapu walay curfew break panahon sa Kalag-kalag.

Gipahibalo kini ni Mayor Paz Radaza atol sa tigom nga gipatawag niya niadtong nakalabay nga semana uban ang kapolisan ug mga opisyal sa barangay isip kabahin sa mga lagda nga ipatuman sa adlaw sa mga minatay.

Nagpasabot nga ang mga menor de edad nga maglatagaw panahon sa lawom nga kagabhion pang- hipuson gihapon. Basin magsalig ang mga batan-on nga palabyon lang sa mga otoridad ang ilang pagsuroy- suroy karong gabii hangtod na sa Nobiyembre 2, nasayop mo kay segurado gyud nga signiton kamo sa mga otoridad.

Samtang sugod karong adlawa nakatutok na ang tanang pwersa sa kapolisan uban sa pag-abag sa mga sakop sa kasundalohan ug mga barangay force multipliers sa tanang mga sam-ang. Gani karong gabii didto na sa mga menteryo mag-overnight ang mga tawo.

Pahimangno lang sa mga gidili sulod sa menteryo sama sa mga mahait nga hinagiban, ilimnon nga makahubog, ug mga instrumento sa musika. Angayan hinumduman nga ang Kalag-kalag mao ang Adlaw sa mga Minatay ug haum lang nga respetohon nato sila ug dili  moeksina ang mga buhi.

Nanginahanglan og hugot nga pag-ampo ang kalag sa mga mahal nato sa kinabuhi nga mitaliwan na sa laing kalibutan. Mao kini ang angayang himoon sa mga buhi imbis magsige og lala sa ilimnong makahubog.

Labaw sa tanan mag-amping ug magmatngon sa kanunay sa atong palibot gikan sa mga tawong dautan nga posibleng magsabwag og kadaut.

Una nang gikataho ang posibilidad nga presensya sa mga teroristang Abu Sayyaf sa Sugbo busa igmat gyud kanunay.

Basin ang tanan nakatutok lang didto sa sam-ang ug nataligam-an na ang atong pinuy-anan nga humot kaayo sa mga kawatan. Dili lang gyud mokompiyansa aron dili masugamak sa disgrasya.