Nunal (22)
“SAAN, Nesto? Saan makikita si Bianca Nunal?’’
Nangingibabaw ang boses ni Robert sa maharot na music na pumapailanglang kasabay sa paggiling ng mga dancer sa stage.
“Nasa probinsiya raw po si Bianca, Sir Robert,” sabing pabulong ni Nesto habang nakalapit ang bibig sa taynga ni Robert.
“Saang probinsiya?”
“Sa Oriental Mindoro raw Sir Robert.’’
“Saan sa Mindoro, Nesto?’’
“Bgy. Maragooc.’’
“Ano pang detalye, Nesto?’’
“Ang isa pa Sir e hindi nga Bianca ang tunay na pangalan.”
“Ano raw?’’
“Hindi po sinabi. Basta yung Bianca e alyas lang daw.’’
“Sabi ko na nga ba. Kaya nga hindi ko siya makita sa Miguelin e dahil hindi Bianca ang kanyang pangalan.’’
“’Yan lang po ang nakuha kong info Sir Robert.’’
“Paano mo nakuha? Kanino mo nakuha?’’
“Napilit ko po si Jinkee. ‘Yung nakausap mo rito nun. Kasi nangailangan ng pera si Jinkee at nagpatulong sa akin na makiusap kay Bossing. E palibhasa, may utang na loob sa akin, napilit kong pagsalitain ukol kay Bianca. Sabi sa akin ni Jinkee, huwag akong maingay at hindi raw iyon pinasasabi ni Bianca.’’
“Bakit daw?’’
“Hindi na po binanggit. Basta nasa Mindoro na ito – sa Bgy. Maragooc.’’
“May malalim kayang dahilan kung bakit umalis dito sa Pugad-Uwak?’’
“Wala na pong sinabi. Pero siguro kung hihingi uli siya sa akin ng tulong, puwede ko uli siyang tanungin. Pero palagay ko, magtataka na si Jinkee kung bakit ganun na lamang ang pagtatanong ko kay Bianca.’’
“Hindi bale, Nesto. Basta ang mahalaga e nasabi kung nasaan si Bianca. Pero ano kaya ang tunay niyang pangalan?’’
“Hindi na po sinabi, Sir.’’
“Maaasahan ka Nesto. At gaya ng sinabi ko, magiging paldo ka kapag nabigyan mo ako ng magandang info,” sabi ni Robert na nakangiti at saka dinukot ang wallet. Limang tig-iisang libo ang kinuha roon.
“Eto ang P5,000. Pagbalik ko rito, may another P5,000 ka pa.”
“Sir okey na ito. Tama na ito Sir!’’
“Hindi! Pagbalik ko rito, may singko mil ka pa!’’
“Maraming salamat Sir. Hayaan mo at pipigain ko si Jinkee. Palagay ko may makukuha pa ako sa kanya.”
“Sige Nesto pero kung wala, okey lang.’’
“Anong balak mo Sir?’’
“Pupunta ako sa Mindoro – sa Bgy. Maragooc.’’
“Ingat ka Sir.’’
“Salamat Nesto.’’
NAG-FILE ng leave si Robert. Nang Linggo ring iyon, nasa bus terminal na siya para magtungo sa Mindoro. Hahanapin niya si Bianca.
(Itutuloy)
- Latest
