Napul-an sa long distance relationship

Ako si Keith,  di nako tinuod nga pangalan. Naa ko’y uyab karon apan in a long distance relationship mi. Naa siya sa California, unya naa ko diri sa Cebu. Mag-usa ka tuig na ‘mi nga LDR pero nag-uyab mi kay 3 years na. Tungod sa among situation, naghinay-hinay na’g ka bag-o ang akong gibati alang niya. Sa una, halos di gyud mi mabuwag kay pirmi rami gakuyog. In love gyud kaayo ko niya before. Karon, maantos ra nako nga di na mi mag-istorya bisan pa’g usa pa na ka semana. Tungod siguro kay naa ko’y bag-ong nakaila nga babaye. Sugod nag-ila mi, siya na kanunay ang akong ka-istorya sa chat, text, ug tawag. Magsige pud mi’g laag apan di mi uyab ha. Mura’g MU lang. Galisod na pud ko kun kinsa gyud ang pilion nako nila’ng duha. Ang akong uyab karon, wa nako magpabatyag kaniya aron siya na mismo ang makigbuwag nako. Di ko ganahan nga ako ang makigbuwag niya kay masakitan gyud siya. Sakto ba ni ako’ng gibuhat o mas maayo nga ako na ang makigbuwag ron?

* * *

Keith, di gyud sayon ang long distance relationship. Nakalisod sa LDR? Gasto kaayo og plete. Lisod ang LDR apan makaya ra man na kun loyal ug faithful gyud ka’s imong uyab. Karon, galisod na ka’g pili kun kinsa ang imong pilion kay di man ka kahibawo makontento sa usa. Pero ingon nila, kun papilion kuno ka sa duha, pilia na lang tong imo’ng ikaduha. Kay di man ka makagusto ato kun tinuod gyud ka na inlove sa uyab nimo. Ayaw sila idungan, Keith. Kun wa na ka’y feelings alang sa imong uyab, ingna siya. Don’t leave her hanging kay di siya hinayhay. Kun nanguyab ka’g tarong, pakigbuwag sab og tarong. Man up! Bisan pa og ikaw ang makigbuwag o siya, masakitan man gihapon siya. Kun ikaw ang makigbuwag niya, at least, kahibawo siya kun unsa na’y nahitabo. Di siya makurat nga nawala lang ka’g kalit. Kahibawo na siya kun unsa iyang buhaton. Di siya mahimo’ng tanga nga magsige’g huwat sa tawo nga anaa na diay laing gusto. Di pud tika mabasol ngano’ng nakagusto ka’s lain. Pero at least, be honest. Pahibaw-a imong uyab kun unsa na’y nahitabo nimo. Kun magbuwag man gyud mo, ayaw basula ang “long distance” nganong break namo’ng duha. Wala na sa distansya, naa ra gyud na’s tawo.