Sec. Dino supak COOP buhisan

CEBU, Philippines - Nipasalig si Presidential Assistant for the Visayas Michael Lloyd Dino nga iyang ipaabot sa Malacañang ang iyang baruganan sa pagsupak nga buhisan ang mga kooperatiba sa nasud.

Si Dino nipadayag sa iyang baruganan isip suporta sa mga kooperatiba atol sa ika-20 nga General Assembly sa Cebu News Workers Multipurpose Cooperative diin siya ang pinasidunggang mamumulong.

Duha ka balaudnon ang nag-ung-ong karon sa Kongreso tumong sa pagpahamtang og buhis sa mga kooperatiba.

Si Dino sa iyang bahin nipadayag nga 100 porsiyento siyang supak sa maong lakang.

Iyang gipasabot nga ang kooperatiba nakatabang sa mga kabus tungod kay ang kooperatiba maoy daling madaganan ug mautangan kung nagkinahanglan kini og kwarta ilabi na sa emerhensiya.

Human sa Semana Santa, si Dino mopagawas og position paper labot sa iyang baruganan.

Si Dino namahayag nga samtang ang pamatigayon maoy driver sa paglambo sa ekonomiya, siya nagtuo nga ang mga kooperatiba dako sab og natampo sa socio-economic development sa nasud.

Giasoy ni Dino ang kalampusan nga nakab-ot sa Newscoop isip nag-inusarang kooperatiba sa media sa Pilipinas.

Base sa report sa chairman sa Newscoop, Elias Baquero, nga ang kooperatiba aduna nay asset nga P37.904 milyones diin nagsugod kini sa tuig 1996 sa P72,000 nga share capital.

“The figures in your hand are a testament of economic viability of Newscoop. There’s nothing more which I can say, except to encourage you to move forward and be known to the rest of the country. Be a model to media communities outside Cebu,” matud ni Dino.

Sumala pa ni Dino nga samtang nagkompetensiyahanay ang mga sakop sa media (newspaper, radyo ug telebisyon) adunay kooperatiba ang media sa Sugbo diin kini nagkahiusa ug nagkahigalaay ang tanan.

Tungod niini, mohimo og lakang si Dino nga makaluwat og Executive Order si Presidente Rodrigo Duterte sa pag-ila sa Cebu Press Freedom Week diin ang tanang sakop sa media nagkahiusa sa pagsaulog matag ikatulong semana sa Septiyembre matag tuig.

Buot usab hiusahon ni Dino ang mga haligi sa Cebu media alang sa usa ka tigum aron matabangan ang iyang opisina, ang Office of the Presidential Assistant for the Visayas, aron sa pagkompleto sa mga kinahanglan sa dili pa luwatan ang maong Presidential directive o Executive Order. - /GMR) (BANAT NEWS)