Kapolisan, transportasyon nangandam sa Semana Santa

CEBU, Philippines - Andam na ang Cebu Provincial Police Office (CPPO) alang sa umaabot nga Semana Santa ilabina sa pagbantay sa kaislahan nga dugokon sa mga turista. Lakip nga nangandam ang mga bus operators ug transportation agencies.

Gipahibawo ni PCInsp. Gerard Pelare, hepe sa Provincial Operations and Plans Branch sa CPPO nga gitutukan nila karon ang dapit sa lalawigan nga dagsaon sa katawhan matag Semana Santa sama sa Lungsod sa Minglanilla, San Remigio ug Bantayan Island.

Samtang dul-an sa 30 ka sakop sa bus ug mini bus operators ang nakigtagbo sa mga opisyal sa LTO, LTFRB ug Cebu South Bus Terminal aron tukion ang seguridad sa mga pasahero atol sa Semana Santa.Matud ni LTFRB-7 Assistant Regional Director Reynaldo Elnar, mopahigayon sila og inspection sa garahian sa mga operator ug sa terminal. Gisugdan na sab nila ang pag-isyu og special permit apan gilimitahan aron masiguro nga dili mabiyaan ang naandan nga rota sa mga sakyanan.

Si LTO 7 Director Alita Pulga, niawhag sa mga operator ug drayber sa pagsiguro nga makab-ot ang zero accident. Awhag niya sa pagsusi sa mga unit ingon man pagtamod sa lagda sa trapiko.

Ang presidente sa Cebu South Mini Bus Operator Association ug tigpamaba sa Cebu Provincial Bus Operators Association, Julie Flores, nibutyag nga mipahigayon sila og tigum aron masiguro kanunay ang kaluwasan sa mga pasahero.

Gawas sa pahimangno sa ilang mga kaubanan, giawhag sab ni Flores ang mga sumasakay nga magmabinantayon ingon man dili magpanuko sa pagkuha sa pangalan sa mga kaskador nga drayber. Jojo C. Ugdol ug Rowena D. Capistrano (BANAT NEWS)