Supak sila sa towing

Ang uban miingon nga ang “towing operation” sa mga sakyanan nga ipataka lang pag-parking daplin sa mga karsada, dili gayud makasulbad sa problema sa trapiko.

Aw tinuod, dili gayud hingpit nga makasulbad sa problema sa kahuot sa sakyanan, apan makatabang nga momenos ang problema sa trapiko kay kun wala’y magparking daplin sa hagip-ot kaayo nga karsada, makaagi ra man dayon ang mga sakyanan.

Kun ako ang pahimoon og sugyot, dasigon nako ang mga pribadong sektor nga sila ang mohimo’g daghang parking area dinhi sa dakbayan sa Sugbo aron nga anaa na, idili na gyud ang pagparking daplin sa karsada.

Ang karsada dili gyud gamiton nga parkinganan. Kadtong mga tag-iya og sakyanan adto moparking sa mga private parking area ug ang dakbayan mohunong na sa pagnegosyo sa karsada.

Hinuktuki ra gud kun wala nay moparking sa atong mga karsada, dili ba tulin kaayo nga makasibog ang atong mga sakyanan. Unsaon, daghan kaayo ang ganahan mopalit og mga sakyanan apan wala’y kaugalingong parking area.

Magkagot ang akong ngipon sa kalagot nga magtan-aw niining mga sakyanan nga anha ra sa karsada ipang-parking, ilabi na og hagip-ot kaayo ang gidak-on sa karsada. Mga tag-iya niining maong mga sakyanan wala’y mga uwaw ug kaikog nga nakasakripisyo sila sa uban.

Dayegon nako ang mga tag-iya og sakyanan nga duna gyu’y grahe ug wala maghasol sa uban nga masakripisyo tungod sa ilang kaabusado. Daan na nga si Mayor Tomas Osmeña miingon nga pabor kaayo siya nga ibalik ang towing operation.

Lauman usab nako nga ang mga konsehal nga kontra sa politika sa mayor, ilabi na si higalang Konsehal Joel Garganera, dili na unta magbabag-babag kun ipatuman na pagbalik ang towing operation.

* * *

Nakunpirmar na gyud nako nga wala gyud tumana sa tag-iya niining gitukod nga bag-ong building, tupad sa Colonnade sa dalan V. Gullas, ang “setback” nga gilatid sa balaod.

Ang lagda mao nga gikan sa “property line” sa yuta nga tukoran og building, moatras pa kini og lima ngadto sa walo ka metros usa pa ang haligi sa building itukod.

Nakita nako nga ang maong building nga gitukod anaa gyud kilid sa aseras. Tukma ba gud kana ang gihimo sa tag-iya sa maong building? Pangutan-on nato ang tagdumala sa Office of the Building Officials.

Ambot og nag-inspection ba kaha kining mga opisyal ug kawani sa OBO sa mga mi-apply kanila og permit. Nakadungog ko nga ang permit nga gipangayo niining maong building, “renovation” apan ang gihimo nila, nagtukod gyud og bag-ong building.