Engkuwentro: 3 ‘Maute’ todas
MANILA, Philippines - Tatlo umanong miyembro ng Maute terrorist group ang nasawi nang salakayin ng Joint Task Force ZamPeLan (Zamboanga Peninsula, Lanao) ang balwarteng lugar ng mga kalaban sa Lanao del Sur kamakalawa.
Batay sa ulat, dakong alas-9:00 ng umaga nang magsagawa ng FMO (focused military operations) ang tropa ng militar nang makasagupa ang nasa 30 teroristang grupo sa pamumuno ng isang alyas Afgan sa pinagkukutaan ng mga ito sa Brgy. Ragayan, Poona Bayabao, Lanao del Sur.
Tumagal ng may 45 minuto ang bakbakan na ikinasawi ng tatlong terorista, dalawa rito ay narekober ang bangkay sa lugar habang ang isa pa ay binitbit naman ng mga nagsitakas ng mga itong kasamahan.
Wala namang nasugatan at nasawi sa panig ng naalertong tropa ng mga sundalo sa nangyaring bakbakan at narekober ng tropa ng pamahalaan sa encounter site ang tatlong M14 rifles, isang garand rifle, isang M16 rifle na may nakakabit na M203 grenade launcher, dalawang Improvised Explosive Devices at sari-saring bala ng mga matataas na kalibre ng mga armas.
- Latest