Mga batan-on gidasig sa panguma
CEBU, Philippines - Gidasig ni Bokal Thadeo Jovito “Jonkie” Ouano ang kabatan-onan sa Probinsiya sa Sugbo sa pagpanguma kauban sa Department of Agriculture.
Gipasar sa hunta probinsiyal ang resolusyon ni Ouano nga nagdasig sa mga batan-on nga makiglambigit sa mga programa sa agrikultura sa probinsiya.
Matud ni Ouano nga nagkadaghan ang populasyon sa mga batan-on nga dako og matabang sa pagpalambo sa Probinsiya sa Sugbo.
Gisugyot ni Ouano ngadto sa DA ang pagpakiglambigit sa mga pundok sa kabatan-onan sa kabarangayan ilabi na niadtong wala nagtungha nga mosalmot sa ilang mga programa sa agrikultura.
Base sa report sa International Labor Organization (ILO) nga 32 porsiyento ang kahigayonan sa panarbaho sa agrikultura lukop kalibutan ug 39 porsiyento niini sa Asya ug Pasipiko.
Apan ang ILO nagkanayon nga ang minilyon ka batan-on nga nag-edad og 15 hangtud 40 nagtan-aw sa panguma nga ubos kaayo. (BANAT NEWS)
- Latest
