Katahuran

Nakoy gi-block sa walay pagduha-duha last Friday afternoon sa Facebook. Gisapot ko. Katugon ko maong walay panahon sa mga attitude problem. Bitaw, ang rason ra gyud nganong ako siyang gi-block kay napungot nga nideretso lang og pangutana—wala mangayo og katahuran.

Gamay ra no? OA ra ko? Bahala mo’g unsay inyong hunahuna ug unsay inyong reaksyon—wa koy labot! Pakkk! Bitaw big deal kaayo na nako. I judge a person’s character through that, labi na’g permiro pang kita o una pa lang nimong message nako.

So kato siya first time pa niyang message nako. Nidiretso’g pangutana pila ka picture ang pwedeng ipada para sa Handumanan portion sa Banat Kalandrakas. Akong gitubag og usa, unya akong gitan-aw iyang profile. Bata pa man kaayo’g dagway uy, maong nisamot akong sapot. Klaro kaayong manghud pa nako. Unya nangutana na sab siya kun pwede pa ba mag-send. Wala na nako tubaga. Akong gi-block na dayon. Pakkk!

Apan dili kay mga bata ra ang ingon ana—hasta sab ang mga hingkud na. Dili na gyud makamaong mangayo og katahuran ang mga tawo. Naglibog ko ngano, dili man unta ta mga istatuwa. Mga tawo ta. Aduna tay mga baba ug mga mata. Mulihok ta. Makasulti ta. Apan kasagaran nato, dili na gyud makamaong mangatahuran. Ngano man, abtan ta og buntag or usa ka tuig kun mu-greet ta sa atong isigkatawo. Kanang mag-good morning ta, mag-good afternoon or mag-good evening, makabati na’s atong nawong? Matuk-an ta? Mugahi atong baba? Pakkk!

Dili na nato kalimtan ang maong gawi unta, my dear okRYANians. It makes you feel good. And it leaves a good impression to others. It says a lot about your character. Ang simple nga greeting posibli nga muganoy nimo to places of great opportunities. Wala baya ta makaila sa tanan natong mahimamat. What if ang atong mahibalag usa niana ka adlaw hari diay of some kingdom or milyonaryo nga nangita’g mga empleyado o mga tawo nga kasaligan niya ug ang himuon niyang basehanan mao ang una ninyong panagkita? Pero samtang wala pa muabot ang maong sitwasyon, mag-practice nata og pangayo og pangatahuran aron maanad ta sa ngadto ngadto unya natural  lang kaayo na nato buhaton. Trust me, bisa’g dili ka maanyag o ambongan, basta makamao lang ka mangatahuran, mugwapa ug mugwapo gyud ka sa mga mata sa imong kaatubang. Pakpak!