PRO-7 dili makatabang sa BJMP-7
CEBU, Philippines - Dili na makatabang ang Police Regional Office 7 sa mga sakop sa Bureau of Jail and Penology-7 kun sila mangayo og tabang kun mohimo silag operasyon sulod sa mga prisohan.
Gitug-an ni PCSupt. Noli Taliño, director sa PRO-7 nga angayang makig-alayon ang BJMP-7 sa buhatan sa PDEA-7 aron ilang mahimo ang ilang plano kay ang PDEA na man ang gitahasan karon nga mohimo sa kampanya kontra drugas.
Ang pamahayag migawas human sa sunod-sunod nga nasakpang drugas nga sulay unta nga gipasulod sa Cebu City Jail pipila ka adlaw na ang nakalabay.
Sigun ni Taliño nga ang mahimo lang nila karon mao ang paghatag og impormasyon sa PDEA-7 kabahin sa mga nalambigit sa mga ilegal nga drugas.
Andam hinoon sila nga mohatag og seguridad sa mga ahente sa PDEA-7 gawas sa Cebu City Jail kun ang taga PDEA-7 anaa sa sulod sa maong prisohan aron paghimo sa ilang trabaho, apan dili gyud sila mahimong mosulod ug mag-apil-apil sa trabaho sa PDEA.
Sayod si Taliño nga kulang ang mga sakop sa PDEA-7 apan masaligon siya nga mahimong magmalampuson ang maong buhatan sa ilang tahas nga gihatag kanila. (BANAT NEWS)
- Latest
