Korver misalida na
CEBU, Philippines - Sayod si LeBron James nga si Kyle Korver duna pa’y ikabuga ug mao kini ang hinungdan nganong gusto siya nga ang 35-anyos nga sharpshooter masakop sa ilang team.
Tuod man, wala siya pakyasa ni Korver.
Gipakita ni Korver nga hait gihapon siya ug dili angay kompiyansaan human mipabuhagay og 29 puntos sa dihang ang Cleveland Cavaliers mibangon human malubong og 15 puntos dayon na ngadto sa pagpilde sa Indiana Pacers, 132-117 sa NBA kagahapon didto sa Banker's Life Fieldhouse sa Indianapolis, Indiana.
Hinuon, misalida sab silang James, Kyrie Irving ug Kevin Love sa maong daog nga maoy misikad sa upat ka road games sa Cavs. Si Irving mitapos sab og 29 puntos uban ang pito ka assists, si James dunay 25 puntos, siyam ka assists ug unom ka rebounds, samtang si Love mihipos og 14 puntos ug 10 ka rebounds.
Sa laing aksiyon, ang Western Conference leaders Golden State Warriors ug San Antonio Spurs mipaluhod sa tagsa-tagsa nila ka mga kontra.
Mihaw-as gikan sa labing bati niyang duwa sukad mitapon sa Golden State, si Kevin Durant namawi pinaagi sa pagratsada og 22 puntos, 10 ka rebounds, pito ka assists ug tulo ka steals sa dihang gitumba sa Warriors ang Chicago Bulls, 123-92, samtang si Kawhi Leonard mipabuto og 32 puntos aron pagpangu sa Spurs batok sa Philadelphia 76ers, 111-103.
Si Klay Thompson midugang og 28 puntos uban ang unom ka tres alang sa masadya nga selebrasyon sa ika-27 niyang adlaw’ng natawhan, samtang si Stephen Curry midonar og 13 puntos ug unom ka rebounds alang sa Warriors nga wala gihapon mapilde og duha ka sunod-sunod nga regular season games sukad niadtong Abril 2015.
Samtang miabag ni Leonard si Tony Parker nga mitali og 18 puntos alang sa Spurs. (BANAT NEWS)
- Latest
