FOI ordinance gi-veto ni Tommy

CEBU, Philippines – Gi-veto ni Cebu City Mayor Tomas Osmeña ang ordinansa nga gipasar sa konseho mahitungod sa pagpatuman sa “Constitutional policies of full public disclosure and transparency in the public service to guarantee peoples constitutional rights to information” o ang Freedom of Information (FOI).

Gipasabot ni Osmeña nga pabor siya sa transparensiya apan tungod kay duna nay nasudnong balaud niini nga bag-o lang napasar angay huwaton kung unsaon kini sa pagpatuman ug unsay epekto niini.

Gipadayag sa mayor nga kung maghimo og ordinansa ang siyudad labot sa Freedom of Information (FOI) nga nagsunod sa probisyon sa nasudnong balaud hayan maglisud pagbakwi ang siyudad kung dunay kapalpakan ang pagpatuman niini ug nabalaka ang mayor nga ma-abusaran kini. Gitataw sa mayor nga dili siya motugot nga pugngan siya sa unsay gusto niyang isulti kay siya ang tinubdan sa kasayuran ug impormasyon dungan sa pagbutyag nga ang hatagan og prayoridad ang The Freeman ug ang ubang mantalaan mahimo rang mangopya.

“No way, will I give up my freedom of speech? I talk to whoever I want to talk to. Right now if I have news to give I will prioritize The Freeman, you copy from The Freeman. I don't bribe the media but I give news, I make the new,” sigun ni Osmeña.

Samtang gisaway ni Osmeña ang konseho nga maoy nipasar sa ordinansa nga gusto og tranparensiya apan matud pa hangtud karon wala pa kita ang mayor sa kopya sa deed of sale ug consortium agreement kalabot sa pagbaligya sa 45 ka ektaryang luna sa South Road Properties (SRP) ngadto sa tulo ka investors nga giuyunan sa konseho atol sa administrasyon ni kanhi mayor Michael Rama. (BANAT NEWS)