1 patay, 9 sikop sa buy-bust

CEBU, Philippines - Patay ang usa ka high-value target nga suspek sa pagpayuhot og ilegal nga drugas dihang nisukol sa kapolisan atol sa buy-bust operation sa Gun-ob, Dakbayan sa Lapu-Lapu niadtong Huwebes pasado alas 6 sa gabii.

Ang suspek giila nga si Clifford Degollacion, 31, taga Sunrise Village, Purok Caimito, Gun-ob.

Ang suspek nisurender na niadtong Septiyembre inubanan sa iyang inahan ug asawa apan adunay nitaho sa kapolisan nga padayon gihapon ang ilegal nga negosyo sa pamilya.

Matud ni Police Chief Inspector Jaime Silorio Tolentino nga ang kapolisan ug Philippine Drug Enforcement Agency-7 ang nipahigayon og operasyon.

Si Degolacion giingong nibunot ug nipabuto sa iyang armas apan wala kaigo sa poseur buyer hinungdan nga ang back-up nga mga polis ang nakapusil kaniya.

Nasikop sab sa kapolisan ang asawa sa suspek nga si Joelly Jane Abanto Degollacion, 27; inahan nga si Alixis Degollacion ug si Argie Lumayag Degollacion, 32, alalay sa suspek.

Nasakmit sa maong operasyon ang walo ka bulto nga drugas ug 36 ka gagmay’ng pakete sa gidudahang shabu nga nagkantidad og P354,000.

Laing nasikop sa kapolisan ug sa PDEA-7 ang duha ka tigpayuhot og ilegal nga drugas sa Zone Lato, Calawisan, Dakbayan sa Lapu-Lapu nga sila si Myles Henson Cadavero Algar, 23, ug Kim Janine Berame Lubrin, 25.

Nasakmit sa duha ang lima ka medium-size nga gidudahang shabu ug tulo ka gagmay’ng pakete sa shabu nga ang tanan kantidad og P40,000.

Samtang gidudahang pusher sa Basak-Merkado, Basak, Dakbayan sa Lapu-Lapu ang nasikop sa buy-bust operation sa mga sakop sa Presinto 4 sa Lapu-Lapu City Police Office (LLCPO) alas 9 pasado sa niaging gabii.

Si Police Senior Inspector Alcon Escosura Acop, acting chief sa Presinto 4, niila sa nadakpan nga si Ribomafil Amoro alyas Dodo, 43, minyo, walay trabaho. Nakuha sa kapolisan gikan sa dinakpan ang lima ka pakete sa shabu.

Laing gidudahang pusher nga nadakpan mao si Armando Oyao Amistad, 50, ug kauban nga babaye nga giila nga si Wilma Bartido Amistad, 48, taga Barangay Agus.

Ang mga sakop sa City Anti-Illegal Special Operation Task Group sa LLCPO ang nagpahigayon og buy-bust batok sa dinakpan nga giilang high-value target sa ilang listahan sa mga pushers.

Nasakmit gikan sa mga dinakpan ang 32 ka gagmay nga pakete sa shabu. Lendilyn Alquilos ug Romeo T. Limpangog (BANAT NEWS)