Pacquiao payag labanan si McGregor sa boxing ring

MANILA, Philippines – Ilang beses nang napag-usapan ang sinasabing bakbakan nina dating world five-division champion Floyd Mayweather Jr. at UFC superstar Conor McGregor.

Sinabi ni Mayweather, nagretiro noong Set-yembre ng 2015, na handa siyang labanan si McGregor sa isang boxing match at hindi sa octagon kung babayaran siya ng $100 milyon ng UFC.

Sa isang panayam ng Fox Sports Australia kamakailan ay nabanggit din kay Filipino world eight-division titlist Manny Pacquiao ang napaulat na pagtatakda ng paghaharap nina Mayweather at McGregor.

Ngunit ito ay hindi sineryoso ng 38-anyos na Senador.

“I don’t know if they are taking it seriously. It’s on the news but I don’t know if it will happen,” wika ni Pacquiao.

Tinanong si Pacquiao kung handa siyang labanan si McGregor.

“In boxing? In boxing I would fight McGregor but not in UFC, just boxing,” sabi ng 38-anyos na si Pacquiao, nakatakdang itaya ang kanyang suot na World Boxing Organization welterweight crown kay Australian challenger Jeff Horn sa Abril.

Inalok ni UFC president Dana White si Mayweather ng guaranteed purse na $25 milyon para labanan si McGregor, ngunit ito ay pinagtawanan lamang ng American legend na kumita ng $300 milyon sa kanyang laban kay Pacquiao noong Mayo ng 2015.

Ilang sparring footage ang nakita sa social media kung saan ipinakita sa video na nahihirapan si McGregor sa kanyang pakikikpagsabayan kay welterweight contender Chris Van Heerden ng South Africa.

“I didn’t see it (footage ng sparring ni McGregor). But if we are talking about Conor McGregor and boxing, it’s different. Boxing is different than MMA,” sabi ni Pacquiao.