Piyesta Senyor: Excellent weather

Nag-uwan tibuok buntag sa Sabado, bisperas sa kapiyestahan sa Balaang Bata, apan, miarang-arang ang panahon pag-fluvial parade, ug mibunok ang uwan human sa fluvial parade, apan wala makasanta sa mga kalihukan ug presentasyon sulod sa Pilgrim Center.

Pagkahapon-hapon, miundang ang uwan hangtod na sa pagkatapos sa religious procession ug sa Santos nga Misa. Pagkaugma, sa kahulogan sa selebrasyon, gikan sa mga Santos nga Misa sa kaadlawon, hangtod na sa Sinulog festivities, perfect ang panahon, hangtod na sa tibuok gabii.

Apan, gahapon, liwas sa mga selebrasyon, sa kaadlawon pa lang mibunok ang uwan nga nakabaha ug nakapalunop sa daghang dapit sa dakbayan.

Unsa man to, Sto. Niño-Sinulog special weather accommodation, diin ang low pressure gipugngan lang una aron dili makasulod sa dakbayan?

Ug bahin sa pagpa-inutile temporarily sa mga cellphone, alang nako, samtang ubay-ubay ang naglagot niini, nakaayo ug nakatampo kadto sa paglampos sa tibuok nga selebrasyon, ilabi na sa aspeto sa kahusay ug kalinaw.

Miingon sila nga mimenos kuno ang nanambong sa procession ug sa grand parade, kay lagi, walay cellphone. So, what, and who cares?

Sa mga religious nga kalihukan, ang tanang nanambong niini, sa Santos nga mga Misa ug sa procession, labing seguro naka-concentrate na sila sa pag-ampo ug sa pagpamalandong – salamat sa pagka-inutile sa mga cellphone.

Sayo nga nahuman ang Sinulog grand parade, ug napamenos ang mga  street parties ug paghuboghubog nga kun buot hunahunaon, walay labot sa kapiyestahan. Angay hinumdoman , nga ang Sinulog is both a festival and an offering. Sa ato pa, dili purely kiat-kiat, ni paghuboghubog.

* * *

Napatik sa Philippine Star, ambot unsa to nga petsa, nga kuno si Presidente Digong Duterte naglaraw pagtukod og “Iglesia ni Duterte.” Matud niya: “The Church is not giving anything even if they collect so much.” Iya sad ni. Dili lang ta mangomentaryo niini.

Apan, may nadunggan usab ko nga si Manny Pacquiao magtukod sab kuno og “Iglesia ni Pacquiao.” I hope dili ni tinuod. Hinoon, maayo man sab og daghang relihiyon, aron daghan sab ta’g kapilian kun hain kanila ang makapalangit kanato.

Ug kadtong nagbalhin-balhin og relihiyon, sama sa pagbalhin-balhin og partido sa politika, giunsa man nila pagseguro nga ang ilang gibalhinan nga relihiyon mao gayud ang tinuod nga relihiyon, nga tinukod ni Cristo?

* * *

Ambot unsa to nga tuiga nga ang atong nasud misagop sa silot sa kamatayon, apan wala kadto makasanta sa mga heinous crimes. Mo-work out kaha ni karon kun ato na usab nga ibalik ang dealth penalty?