Mga iro sa rota sa prosesyon, parada ipahipos

CEBU, Philippines - Mga iro nga magsaoy-saoy sa mga rota sa Sinulog Grand Parade ug sa Solemn Procession, konpiskaron sa mga sakop sa Department of Veterinary Medicine and Fisheries kon DVMF.

Gipahibawo ni Dr. Alice Utlang ang pangulo sa DVMF nga sugod ugma, Enero 12, ilang ipahigayon ang operasyon sa pagpanakop sa mga iro nga naglaag-laag sa kadalanan nga maagian sa rota sa prosesyon ug sa grand parade aron sa paglikay nga adunay mga tawo nga mapaakan niini.

Giawhag ni Utlang ang mga nanag-iya og iro sa mga dalan nga maagian sa maong mga dagkung kalihukan sa paghipos sa ilang mga hayopan aron dili kini nila madala sa city pound. Dugang niini nga ang mga iro nga adunay tag-iya ila kining ipalukat ug kadtong mga wala’y tag-iya nga mahimong ipa-adopt, ila kining ipa-adopt. (Rowena D. Capistrano/DILT)

2 sakop sa CT-TODA nga nangilkil gitaktak na

Gipalagpot na sa ilang katungdanan ang duha ka mga sakop sa City of Talisay-Traffic Operation Development Authority (CT-TODA) human sila gireklamo sa usa ka drayber sa pampasaheroang jeep kay nangilkil.

Gipahibawo ni Hiram Binatero, pangulo sa CT-TODA nga iyang gitagbo ang mao niyang mga sakop uban ang reklamante.

Matud ni Binatero nga kumbinsido siya sa alegasyon sa reklamante hinungdan nga dali niyang gipalagpot sa trabaho ang duha niya ka mga sakop nga sila Waren Caño ug Gerardo Servania.

Ang duha gipasanginlan ni Juvy Argonitas nga taga Barangay Lutac, Siyudad sa Naga nga maoy nangilkil kaniya sa Barangay Tabunok sa miaging semana.

Si Mayor Eduardo Gullas niingon nga wala pa maabot kaniya ang taho ni Binatero kabahin sa iyang mga sakop. Apan siya niingon nga dili sab maayo nga magpadayon sa ilang trabaho ang mga gipasanginlan kun kini nagbuhat gyud og kasaypanan.

Samtang si Emely Cabrera ang pangulo sa Human Resource Office sa city hall nagkanayon nga dili lisud taktakon ang duha ka gipasanginlan kay sila mga job order employee nga wala’y employer-employee relationship.

Bisan sa maong posisyon, giawhag ang mga JO nga magtinarong aron nga magpadayon sa trabaho. (BANAT NEWS)