Nanghasi napatay sa polis

CEBU, Philippines - Namatay sulod sa Cebu Provincial Hospital sa Dakbayan sa Danao ang usa ka lalaki human kini napusilan sa polis dihang nanggulat ug nanion og armas sa mga tawo sa plaza sa Lungsod sa Carmen pasado alas 8 sa nakalabay nga gabii.

Ang napusilan naila nga si Narciso Taoy, hingkod nga taga Barangay Dawis Norte sa maong lungsod.

Matud ni Senior Police Officer 3 Danilo Laurente sa Carmen Police Station, nga una silang nakadawat og impormasyon nga dunay armadong tawo nga nanggubot sa plaza hinungdan nga dali sab nga niresponde ang ilang mga kauban.

Dihang nakabantay ang suspek sa mga polis, dali kining nidagan paingon sa simbahan ug gigukod sa mga polis.

Dihang gihangyo kini nga mo-surrender, giingong nibunot hinoon sa iyang armas ug niti-on sa polis.

Ang polis nga si PO2 Ralph Laurel nga nagdala og M16 rifle nga gitionan sa suspek ang abtik sab nga nakapusil tumong sa iyang bukton apan ang bala nilapos ug nilubong sa dughan sa suspek.

Nadala pa sa tambalanan ang suspek apan nakabsan sa gininhawa samtang nagpaabot nga dalhon sa Dakbayan sa Sugbo.

Sigun pa ni Laurente nga tumong sa iyang kauban nga igo lang unta nga ipa-disable ang suspek apan way swerte kay nilapos ang bala sa iyang dughan.

Narekober sa mga polis gikan ni Taoy ang.38 revolver nga dunay upat ka bala. Si Laurente niingon nga sa iyang personal nga nahibaw-an walay dili maayong record ang suspek sa ilang buhatan.

Nagpadayon ang pagsubay sa mga polis kung unsa ang hinungdan nganong nanggubot ang suspek sa maong dapit. (FREEMAN)