Protectors ni Kerwin

CEBU, Philippines - Senadora Leila De Lima, mga sakop sa media, mga sakop sa kapolisan ug abogado sa gipasanginlang drug lord nga si Kerwin Espinosa gipasakaan og kaso diha sa Department of Justice ug sa Ombudsman.

Si Police Chief Inspector Jovie Espenido, nipasaka og kaso base sa natigom nilang mga pamahayag gikan sa mga tawong matud pa niya may kalambigitan sa operasyon sa illegal drugs ni Espinosa, anak ni Albuera Mayor Rolando “Daddy Onik” Espinosa Sr. kinsa nabilanggo na karon tungod sa illegal drugs ug illegal possession of firearms.

Matud pa ni Espenido, 23 ka mga sakop sa kapulisan sa Rehiyon 8 ang ilang gikasohan niadtong diha sa Regional Internal Affairs (RIAS)-8 kay giingong tigdawatan sila og drug payola gikan sa mga Espinosa.

Sumala pa ni Espenido, walo usab ka mga government officials ug politiko apil si De Lima ug kagawad sa Barangay Binolho, Albuera, Leyte nga si Nelson Pepito Jr., ang ilang gipasakaan og kaso diha sa buhatan sa Ombudsman sa Tacloban City.

Sa susamang adlaw ilaha usab gikasohan sila si Kerwin, Victor Espina, Joseph Nuñez, Atty. Jonnah John Ungab nga karon bise mayor na sa lungsod sa Ronda, negosyanteng si Winnie Codilla ug lakip ang tulo ka mga sakop sa media didto sa Eastern Visayas nga sila si Leo Dumon, Lalaine Jimenea, ug John Pilapil ang gipasakaan nila og kaso sa buhatan sa DOJ.

Sumala pa ni Espenido, base sa mga documentary evidence ug pamahayag sa mga testigos  ang tulo ka sakop sa media nagdawatan og gikan P8,000 hangtud P10,000 kada semana gikan ni Kerwin.

Si Dumon gipaabot pa nga mopagawas og pamahayag bahin sa akusasyon samtang si Superintendent Marvin Marcos, pangulo sa CIDG-8 kinsa pag-umangkon ni Jimenea miingon nga nasurprisa siya sa kasong giatubang sa iyaan.

Si Codilla, sa sayo pa misalikway sa mga reports nga nalambigit siya sa illegal drugs, ug pinaagi sa iyang kabanay, miklaro kini nga ang kwartang iyang nadawat gikan sa mga Espinosa bayad sa construction project sa mayor didto sa Albuera.

Gibutyag sa hepe, ning umaabot nga adlaw modangop usab siya sa Internal Affairs Service sa kaulohan aron sa pagpasaka usab og kaso sa mga wala niya pangalaning mga heneral nga nalambigit usab sa kalihukan sa mga Espinosa.

Si Espenido nitug-an sa Banat News nga mosaka pa unya ang gidaghanon sa ilang mapasakaan og kaso tungod kay hangtod karon nagpadayon pa ilang case build up batok sa 83 ka mga kawani sa gobiyerno.

Sa report sa GMA News Online, gikataho nga si De Lima ug Kerwin nagkita didto sa usa ka kan-anan sa Baguio City sayo niining tuiga diin matud pa nagkasabot sila nga tabangan ni Kerwin ang senadora sa kampanya niini.

Matud pa human sa panagtigom, gikatahong gidawat sa drayber ni De Lima nga si Ronnie Dayan ang duha ka bag nga dunay sud nga tag P4 Milyones kada usa.

Si De Lima sa mao gihapong report mihimakak sa akusasyon nganha kaniya.  Matud niya wala siya makaila ni Kerwin.

“Kasama na naman ‘yan sa web of lies. Lahat na lang nagbibigay sa’kin ng pera. Lahat na lang so sobra na talaga eh,” matud sa senadora sa maong report.

Samtang si Ungab miingon nga wala pa siya makadawat og kopya sa reklamo batok kaniya, apan siya miklaro nga wala siya masayod nganong giapil siya.

“I have not yet received a copy of the complaint. So far, with my dealings with Kerwin, purely professional man tanan. I don’t know ngano ginganlan ko as protector. Dili siguro drug protector but protector as lawyer. I’ve been his lawyer since 2008 or 2009 ba ‘to. Ako iyang lawyer on appeal kadtong naa siya sa Monte, kadtong nadakpan siya sa Cebu City, and annulment case filed last year sa Ormoc. All of these except the annulment case dismissed na. If madawat na nako ang formal complaint we will file my affidavit. I don’t know gyod why naapil ko. Professional man tanan akong dealings niya,” pasabot pa ni Ungab sa gipadala niining text message sa The Freeman/Banat News.  Si Pilapil sa iyang bahin miingon nga wala pa siya makadawat sa kopya sa kaso apan andam niya kining tubagon ug atubangon.

Ang ubang mga sakop sa media nga naapil sa kaso gisuwayan pagkuha sa Banat News og pamahayag apan walay mitubag sa mga tawag. Rowena D. Capistrano, Kristine Quintas ug Miriam Desacada (BANAT NEWS)