Drug test sa di pa ang tingklase
CEBU, Philippines - Target karon sa Cebu Provincial Anti-Drug Abuse Commission nga mapaubos sa drug test ang mga magtutudlo sa Lalawigan sa Sugbo sa dili pa magsugod ang tingklase.
Matud ni Bokal Carmen Remedios Durano-Meca, co-chair sa CPADAC, nga sunod Lunes magtigum sila uban ang kadagkuan sa Department of Education ug hisgutan ang drug test.
Ang drug test nalangay tungod sa pipila ka rason sama sa pagsunod sa guidelines sa Dangerous Drugs Board ug ang mogasto sa rehabilitation sa mga magpositibo.
Kini gumikan kay walay doktor nga maka-handle sa treatment o rehabilitation ug bisan gani ang rehab center walay kabutangan.
Matud ni Meca nga andam na ang CPADAC sa drug testing ug naghulat na lang sila sa go signal sa DepEd.
Si Gobernador Hilario Davide III nagkanayon nga gawas nga naapiki sa pundo ang probinsiya nagkinahanglan usab sila og tabang sa Philippine Drug Enforcement Agency (PDEA) sa pagpahigayon sa drug test sa mga magtutudlo.
Matud ni Davide nga ang DepEd unta ang mogahin og pundo alang sa drug test sa mga magtutudlo.
Ang drug test gitinguha human pipila ka mga magtutudlo ang gikatahong nalambigit sa ginadiling drugas ug may mga nadakpan. (BANAT NEWS)
- Latest
