Mayor gikasohan didto sa OP

CEBU, Philippines - Nipasaka og kasong Grave Misconduct, Grave Abuse of Authority ug Usurpation of Authority ngadto sa Office of the President niadtong adlaw’ng Lunes sila si Konsehal Pastor “Jun” Alcover ug Konsehal James Cuenco batok kang Cebu City Mayor Tomas Osmeña may kalabutan sa operasyon sa V-hire terminal diha sa Citi Center sa Brgy. Kamagayan.

Matud ni Alcover nag-operate og illegal terminal si Osmeña nga nakalapas sa City Ordinance 1958  nga nag-regulate sa mga establisamento ug operation sa terminals alang sa Public Utility Jeepneys ug V-hires sa siyudad.

Matud niya, molampos man o dili ang reklamo  nila didto sa presidente ang importante nga wala sila mopasagad sa trabaho.

Nasayran nga ilaha nang napirmahan ang reklamo ug giduso na ngadto kang Vice Mayor Edgardo Labella.

Si Labella sa iyang bahin miingon nga magdepende ni Osmeña kun tumanon niini ang resolusyon nga gi-aprubahan sa Konseho nga nagpasira sa terminal.

Si Mayor Osmeña una nang namahayag nga mikita ang siyudad sa terminal ug eksperimento lang kini. (BANAT NEWS)