Yassi umangat dahil kay Coco
Sa kagustuhang mapagbigyan ang napakaraming kahilingan ng manonood na huwag pang tapusin ang matagumpay na seryeng FPJ’s Ang Probinsyano, ginawan ito ng book 2 ng ABS-CBN. Mga bagong mukha ang makikita ng mga manoood na makakasama ng pulis na si Cardo (Coco Martin).
Wala pang resulta ang gagawing pagbomba ni Joaquin (Arjo Atayde) sa kasal nina Cardo at Alyana (Yassi Pressman). Ang mga magiging casualty ang mapapalitan ng mga bagong artista.
Kasama sa mga bagong artista ng AP ay sina Pokwang, Lito Lapid, Mark Lapid, Jhong Hilario, Ejay Falcon, Sid Lucero, at Angel Aquino. Mamamalas pa rin ang mga batang pinalalaki ng mag-lolang Cardo at ng character ni Susan Roces. Pero malulungkot ang mga manoood kung isa man sa mga pulis na kasama ni Cardo ay mabawasan.
Ang sigurado ay may mga character na magbubuwis ang buhay para maisaksak ang napakaraming bagong artista sa AP.
Maswerte naman si Yassi Pressman dahil ilulunsad na siya ng Viva Films sa solo stardom. Kung mangangahulugan ito ng pagkawala niya sa programa ang siya pa marahil na tinatantya ng ABS-CBN. Pero ang pagiging bida sa AP ang nagbukas ng pinto para sa kanyang ibayong pagsikat.
Jason at Vickie nagkakalabuan na
Hindi man makaapekto sa karera ni Jason Abalos ang reklamo sa kanya ng isang babaeng mag-aaral ng De La Salle University ay siguradong magbibigay ito ng hindi magandang resulta sa relasyon niya sa kanyang nobya na dating housemate ng PBB na si Vickie Rushton. I’m sure may mga epekto na sa kanilang dalawa ang naging kaganapan pero dito rin masusubok kung gaano katatag ang relasyon nila.
Tama lang na huwag munang magsalita ang aktor at hintayin ang magiging hakbang ng nagrereklamo sa kanya. Kung sakali mang umabot sila sa korte, dun na lang niya sabihin ang panig niya sa kontrobersya. Pero sa naging pangyayari, pareho silang maaapektuhan ng hindi maganda ng dalagang nagreklamo sa kanya.
Robin kinampihan din si Mocha
Uy, nakakita ng kakampi si Mocha Uson kay Robin Padilla na ipinagtanggol ang pagkakatalaga sa kanya ni President Rody Duterte bilang Asst. Sec. ng Presidential Communications Operations Office (PCOO).
Kung sabagay ay may katwiran naman si Robin sa pagsasabing minamaliit lang ng mga naiinggit kay Mocha ang kakayahan nito dahil sexy performer siya dati. Sinabi rin ng aktor na isa ring appointee ng bagong administrasyon na hindi sila basta-basta hinihirang sa kanilang mga posisyon dahil pinag-iisipan ‘yun ng pangulo. Ipagtatanggol niya sa abot ng kanyang kakayahan si Mocha sa mga kritiko nito.
- Latest