Sigurado na si Morales kung ...

ILOILO CITY, Philippines - Kung mapaghaharian ni Jan Paul Morales ng Navy-Standard Insurance ang Stage 12 Individual Time Trial ngayong umaga ay tiyak nang makakamit niya ang inaasam na ikalawang sunod na korona ng LBC Ronda Pilipinas.

“Pipilitin ko talagang manalo,” sabi ng 31-anyos na si Morales, hangad maging kauna-unahang back-to-back champion ng nasabing 14-stage race na inihahandog ng presentor na LBC katuwang ang MVP Sports Foundation, Petron, Mitsubishi, Versa.ph, Victory Liner, Maynilad, Standard Insurance.

Bibitawan ang nasabing 14-kilometer ITT sa Guimaras na inaasahang kukunin ng tubong Calumpang, Marikina na si Morales, muling isusuot ang Red Jersey.

Binabanderahan ni Morales ang overall individual classification sa kanyang oras na 37:25:56 kasunod ang kapwa Navyman na si Rudy Roque (37:28:11), Cris Joven (37:37:03) ng Kinetix Lab-Army, Bryant Sepnio (37:41:33) ng Go for Gold, Leonel Dimaano (37:46:05) ng RC Cola-NCR.

Ang 25-anyos na si Roque, isinuot ang Red Jersey simula sa Stage One hanggang Stage Seven bago ito naagaw sa kanya ni Morales sa Stage Eight, ang namayani sa nakaraang Stage 11.

“Gagawin ko lang kung ano ang kaya ko, pero kung hindi ko maipapanalo ay susuporta na lang ako kay Jan Paul,” wika ni Roque.

Ang iba pang nasa Top 10 ng individual event na naglalatag ng premyong P1 milyon ay sina Ryan Serapio (37:47:16) ng Team Ilocos Sur, Daniel Ven Carino (37:48:28), Lloyd Lucien Reynante (37:48:43) at Ronald Lomotos (37:48:45) ng Navy at Reynaldo Navarro (37:49:49) ng Army.

Matapos ang Stage 12 sa Guimaras ay pakakawalan naman bukas ang 209-km Iloilo-Antique-Iloilo Stage 13 at ang 50-km Stage 14 criterium sa Sabado.