Mibali ang hangin
Karong adlawa, buk-on ang yuta diin pagatukuron ang 8.25 kilometros nga tulay nga magdugtong sa lungsod sa Cordova sa isla sa Mactan ug Dakbayan sa Sugbo nga nagkantidad og P27 bilyones.
Ang pagtukod sa taytayan posible nga sugdan karong buwan sa Hulyo kun makompleto na ang mga dukomento ug gipaabot nga mahuman sa tuig 2020. Ang taytayan tukoron sa Metro Pacific Tollways Development Corporation.
Sa programa karong adlawa adto sa Sitio Dapitan, Barangay Pilipog, Cordova posible nga mamulong sila si Presidente Rodrigo Duterte, Mayor Tomas Osmeña, Presidential Legislative Liaison Office head Adelino Sitoy ug si magpapatigayon Manny V. Pangilinan, nga maoy chairman sa kompaniya nga motukod sa taytayan.
Si Mayor Osmeña ug Sitoy mamulong isip tigpasiugda sa proyekto samtang si Pangilinan mamulong isip representante sa pribadong sector. Mibali ang hangin. Sayod kita nga grabe ang pagsupak ni Mayor Osmeña sa pagtukod ning maong taytayan.
Gani bisan unsa na lang ang iyang gipanghatag nga rason aron lang gayud mababagan ang katumanan sa maong proyekto kaniadto, pero karon, siya na ang mamulong kauban ni Sitoy, isip tigpasiugda sa proyekto. Maayo no?
Baga diay ni og dagway si Mayor Osmeña? Ngano gud tawon nga gidawat niya ang gisangon sa mga nagpasiugda sa programa nga mamulong isip tigpasiugda sa proyekto nga gisupak man ni niya? Wala mauwaw si Mayor Osmeña sa pagdawat sa gisangon kaniya sa mga nagpasiugda sa programa ning adlawa diha sa Pilipog, Cordova?
Politiko gayud ang mayor kay maayo kining mosakay og oportunidad, tungod kay makapaduol man siya sa presidente ug sa mga dagkong negosyante.
Ako lang pahimangnoan ang mga negosyante nga magmatngon sa ilang pagpakiglambigit ni Mayor Osmeña kay manglutos kini og negosyante, ilabi na niadtong dili mosanong sa iyang gusto.
- Latest