Vendor nanghipos gipusil patay

CEBU, Philippines – Namatay sulod sa tambalanan ang 34-anyos nga sidewalk vendor human gipusil sa buko-buko sa makadaghang higayon samtang manghipos na unta sa iyang baligya sa may Arellano Boulevard, Silangan II, Tejero, Dakbayan sa Sugbo pasado alas 2 sa nakalabay nga kadlawon.

Giila ang biktima nga si Anthony Maquilan kinsa namatay sa Vicente Sotto Memorial Medical Center (VSMMC). Si Senior Police Officer 2 Rommel Bancog, imbestigador sa homicide section sa Cebu City Police Office, niingon nga sa pagkakaron personal nga motibo ang ilang gisubay sa hitabo.

Ang igsuon sa biktima nitug-an sa kapolisan nga niadtong Disyembre nakadawat og pagpanghulga ang biktima human nasuko ang usa ka grupo sa mga lalaki nga gikataw-an.

Si Bancog niingon nga ang maong hitabo mao ang ilang gisubay karon kay walay laing kontra ang biktima sa nanglabay nga mga adlaw ug wala kini rekord sa ilegal nga drugas.

Sa Dakbayan sa Talisay, gipauwanan og bala ang usa ka lalaki  sa Mananga 2, Tabunok, sa niaging gabii. Ang biktima mao si Jonathan Lastimosa alyas Atan, 38, ulitawo nga nagpuyo sa nahisgutang lugar.

Si PO2 Edwin Campomanes sa Talisay City Police Station nagkanayon nga nagmaneho sa iyang motorsiklo ang biktima apan nihunong kini kay may gikuha sa U-box sa iyang motor.

Apan duha ka tawo nga sakay sab og yellow nga motor nga wala'y plate number ang kalit nga nirakrak kaniya.

Nakaangkon og daghang samad pinusilan ang biktima hinungdan sa iyang hinanaling kamatayon.

Matud ni Campomanes nga 10 ka kabhang sa .45 nga armas ang ilang nakuha gikan sa crime scene ug halos dili na maporma ang lawas sa biktima tungod sa kadaghang samad pinusilan.

Base sa ilang imbestigasyon nga adunay gikapuyo ang biktima kaniadto apan nikuyog kini og laing lalaki. Gani ila sab nasuta nga gisigehan og hagit sa biktima ang bag-ong kapuyo sa iyang kanhi hinigugma.

Tungod niini ilang subayon ang maong impormasyon ingon man ang report nga ang biktima tigpayuhot sab og ilegal nga drugas. Jojo C. Ugdol ug Gabriel C. Bonjoc (BANAT NEWS)