Bitaw, unsa may labot sa probinsya sa MCWD?

Finally, nasulbad ra gayud ang problema kun kinsa ang makatudlo sa mga sakop sa Board of Directors sa MCWD.

Sa walay pagtuki sa balaod, kay dili man ta abogado, ug sa dili pagduhig niini sa politika (bisa’g sa sinugdanan diha tingali gamay), kun dili, aron lang makasabot ang yano nga paminsar sa usa ka ordinaryong Sugbuanon.

Makapangutana kita ngano man tuod nga ang gobernador may hatagan og katungod pagtudlo sa mga Board members sa MCWD nga kadaghanan sa iyang mga subscribers ania man sa dakbayan sa Sugbo?

Sa politika, nahinumdom ko nga usa pa ka component city ang Cebu City sa lalawigan, paglansar ni Serging Osmeña pagka gobernador batok sa mga Durano, ambot kinsa to ang kaatbang ni Serging.

Sa sayo nga canvassing sa mga boto gikan sa kalungsoran, midaog ang Durano camp, apan sa final nga pag-ihap lakip na sa mga boto gikan sa dakbayan sa Sugbo, si Serging ang migula nga mananaog, overwhelming pa kaayo.

So, niadtong mga panahona, bisan kun sakop pa kita dinhi sa dakbayan sa lalawigan, ang sentimento gayud sa mga Siyudadnon maoy mo-prevail. Bisan niadtong mga panahona, kun may MCWD na, ang city mayor mao gayud ang makatudlo sa mga sakop sa hunta direktiba niini. Ako lang ni nga pinasagad nga imahinasyon.

* * *

Matud pa, sulod sa unom ka bulan, sugdan na sa mga magbabalaod ang pagtuki sa gisugyot paghimo og kausaban sa Konstitusyon, gitawag ni sa uban og Cha-cha, kon Charter Change, ug pag-shift na ngadto sa Federal system.

Gipaabot nga motudlo si Presidente Duterte sa mga sakop sa consultative commission (Con-Com) nga maoy motuon ug mohimo’g rekomendasyon unsa ang himoon nga mga kausaban ug unsa nga sistema sa federal ang angayan sa atong nasud.

Mo-convene dayon ang Senado ug ang Ubos-Balauranan isip constituent assembly, tapus nila madawat ang mga rekomendasyon gikan sa Con-Com, diin sulod sa tulo ka tuig, ila kining paaprobahan sa katawhan pinaagi sa plebisito dungan sa midterm election sa 2019.

Unya, sa 2022, tapus sa termino ni Duterte, magpili kita og mga opisyal ubos na sa federal form of government. Apan, si Duterte namahayag nga willing siya nga moluwat sa katungdanan, sa higayon nga mapahiluna na ang federal system ug mapili na ang bag-ong presidente, even before his term ends.

Atong masabot nga nagdali si Duterte nga mausab na ang ato karong sistema sa panggobiyerno, ug wala siya madawo sa gahum. Kun matuman, usa ka dako ug dili hikalimtan nga legacy ni Digong.