Youth groups iparehistro sa NYC

CEBU, Philippines - Giawhag sa hunta probinsiyal sa Sugbo ang mga youth organizations sa pagparehistro sa National Youth Commission (NYC).

Kini aron makakuha sila og suporta gikan sa gobiyerno alang sa ilang mga programa.

Si Bokal Miguel Antonio Magpale nagkanayon nga sa Probinsiya sa Sugbo, dunay gatusan ka formal ug non-formal youth organizations nga nagkinahanglan og suporta ug programa aron sila ma-empower sa ilang katungod nga nalatid sa Konstitusiyon.

Sa bag-ong administrasyon karon sa NYC, ang youth organizations dili lang sa Probinsiya sa Sugbo apan sa tibuok nasud ang kinahanglan nga adunay panglantaw aron mahimong kaabag sa kausaban.

Ang Article 2, Section 12 sa 1987 Philippine Constitution nag-ila sa mahinungdanong papel sa kabatan-onan alang sa pag-umol sa nasud ug aron maprotehian ang ilang physical, moral, spiritual, intellectual ug social well-being.

Kinahanglan nga itudlo ngadto sa kabataan ang patriotism ug nationalism ug dasigon sila sa pakiglambigit sa public ug civic affairs. (BANAT NEWS)