So giniba ang Chinese GM, akyat sa No. 2
MANILA, Philippines — Muling kumana ng importanteng panalo si Grandmaster (GM) Wesley So sa sixth round para umangat sa ikalawang puwesto sa prestihiyosong 2018 Tata Steel chess tournament na ginaganap sa Hiversum, Netherlands.
Kinailangan ng 24-anyos Cavite City pride ng 41 moves ng English Opening upang patumbahin si GM Wei Yi ng China.
Ito ang ikalawang sunod na panalo ni So matapos unang igupo si GM Baskaran Adhiban ng India sa fifth round.
Sa kabuuan, mayroon nang apat na puntos si So mula sa dalawang panalo at apat na draws para palakasin ang kanyang tsansang maipagtanggol ang korona sa torneong may nakalaang tumataginting na €10,000 para sa magkakampeon at €6,500 naman sa runner-up.
Sumosyo ito sa No. 2 spot kasama sina GM Anish Giri ng Netherlands at GM Viswanathan Anand ng India na pareho ring may apat na puntos.
Nauwi sa draw ang laban nina Giri at Anand sa kanilang sixth-round game.
Nahablot naman ni GM Shakhriyar Mamedyarov ng Azerbaijan ang solong liderato matapos makakuha ng 4.5 puntos mula sa tatlong panalo at tatlong draws.
Iginupo ni Mamedyarov si Adhiban sa kanilang laban.
Magkasalo sa ikalimang puwesto sina GM Vladimir Kramnik ng Russia at three-time Tata Steel titlist GM Magnus Carlsen ng Norway hawak ang magkatulad na 3.5 puntos.
Nakatali naman sa four-way tie sa No. 7 sina Gm Sergey Karjakin ng Russia, GM Maxim Matlakov ng Russia, GM Gawain Jones ng Great Britain at GM Peter Svidler ng Russia na pare-parehong may tatlong puntos.
Bagsak si Wei sa No. 11 bitbit ang 2.5 puntos.
- Latest