Oladipo tinapos ang kamalasan ng Pacers
INDIANAPOLIS — Sa tulong ng nagbabalik na si Victor Oladipo ay tinapos ng Pacers ang kanilang limang sunod na kamalasan.
Kumolekta si Oladipo ng 23 points, 9 assists, 6 rebounds at 5 steals sa kanyang pagbabalik mula sa right knee injury para tulungan ang Indiana na lumpuhin ang Chicago Bulls, 125-86.
Hindi nakapaglaro si Oladipo sa nakaraang apat na laro ng Pacers dahil sa kanyang knee injury.
Nagdagdag naman si Domantas Sabonis ng 22 points, habang may 15 markers si TJ Leaf para sa Indiana.
Ang ikaapat na agaw ni Oladipo ang nagresulta sa kanyang two-handed dunk para ibigay sa Indiana ang 24-17 abante laban sa Chicago sa 4:51 minuto ng first period at tiningnan ang mga fans sabay taas ng kanyang mga kamay.
“I was just out there playing,” wika ni Oladipo. “I just kind of get lost in the game and do whatever I can to help my teammates. I just try to set the tone on both ends.”
Ang technical free throw ni Darren Collison at basket ni Sabonis ang naglayo sa Pacers sa 31-19 sa huling 2:43 minuto ng nasabing yugto kasunod ang 14-0 ratsada sa second quarter para tuluyan nang ibaon ang Bulls sa 48-28.
Umiskor si Bobby Portis ng 15 points, habang may tig-13 markers sina Denzel Valentine at Lauri Markkanen para sa Chicago.
Sa Orlando, kumolekta si LeBron James ng 33 points, 10 rebounds at 9 assists para ihatid ang Cleveland Cavaliers sa131-127 panalo laban sa Magic.
Nagdagdag si Kevin Love ng 27 points, habang may 19 markers at 4 assists si Isaiah Thomas para sa Cavaliers.
Pinamunuan naman ni Aaron Gordon ang Magic, nalasap ang ikaapat na sunod na kabiguan, mula sa kanyang 30 points kasunod ang 20, 18 at 16 markers nina Elfrid Payton, Evan Fournier at Mario Hezonja, ayon sa pagkakasunod.
- Latest
