All-Filipino finals sa Japan 10-ball meet
MANILA, Philippines — Naplantsa nina Johann Chua at Jundel Mazon ang pagtutuos sa Finals matapos isa-isang patalsikin ang kani-kanilang karibal sa 2017 All Japan 10-Ball Championship sa Hyogo, Japan.
Matikas na pinataob ni Chua si Asano Masato ng Japan sa Round-of-16 (11-4) kasunod ang paggupo sa kababayang si Jeffrey Ignacio sa quarterfinals (11-10) at pagtarak ng 11-2 desisyon kay Liu Hai Tao ng China sa semifinals.
Tinalo rin ni Chua sina Hsieh Chia-Chen ng Chinese-Taipei sa first round (11-8) at Kasper Kristoffersen ng Germany sa second round (11-1).
Ginulantang naman ni Mazon si Ko Ping-Chung sa Last 16 sa iskor na 11-6.
Tinalo rin ni Mazon sina Cheng Yu-Hsuan sa quarterfinals (11-10) at Chang Yu-Long sa semis (11-8).
Nauna nang pinasadsad ni Mazon sina Katsuji Teruya ng Japan sa first round (11-10) at Ko Seng Ann ng South Korea sa second round (11-5).
Hindi naman pinalad sina Warren Kiamco, Lee Vann Corteza at Antonio Lining na natalo sa Round-of-16 matches.
Lumasap si Kiamco ng 7-11 kabiguan kay Liu, umani si Corteza ng 9-11 desisyon kay Chang at natalo si Lining kay De Luna, 3-11.
Nauna nang nasibak sina cue master Efren ‘Bata’ Reyes, Raymund Faraon, Mark Mendoza, Carlo Biado, Francisco Bustamante, Ramil Gallego, Elvis Perez at Hushley Jusayan.
- Latest
