Lazaro, Otico umiskor ng upset, pasok sa semis
Pinormahan ni Leander Lazaro ang parating na bola mula sa kalabang si Johnny Arcilla sa PCA Open.
MANILA, Philippines — Ginulantang nina dating UAAP MVP Leander Lazaro at ITF juniors campaigner John Bryan Otico ang kani-kanilang beteranong karibal upang maisaayos ang kanilang paghaharap sa semifinals ng 36th Philippine Columbian Association (PCA) Open men’s singles na ginaganap sa PCA indoor shell-clay courts sa Paco, Manila.
Mabilis na nakarekober si Lazaro sa mabagal na first set bago itarak ang 5-7, 6-3, 6-3 panalo laban kay eight-time champion Johnny Arcilla habang ginulantang din ni Otico si sixth seed Elbert Anasta, 6-4, 6-2 sa hiwalay na bakbakan.
“I played him before sa isang tournament kaya medyo kabisado ko na ang laro niya. Gusto niyang tapusin agad every rally kaya naging patient lang ako every shot,” wika ni Otico na nakasungkit ng tatlong ITF singles titles sa taong ito - dalawa sa Thailand at isa sa Hong Kong.
Si Anasta ang ikatlong seeded player na tinalo ng Maramag, Bukidnon pride matapos patalsikin sina 16th seed Rolando Ruel Jr. sa second round, 6-3, 6-1 at fourth seed Ronard Joven sa third round, 7-6 (3), 6-3.
Magaan namang umabante sa semis si reigning champion Patrick John Tierro na nagtala ng 6-1, 6-1 panalo kay Fritz Verdad sa torneong suportado ng The Philippine Star, Asian Traders Dunlop, Stronghold Insurance, Whirlpool/Fujidenzo, Head, United Auctioneers, Pearl Garden Hotel, Babolat, Tyrecorp Inc., PVL Restaurant, Greenfield Marketers One, Mary Grace Foods Inc., Coca-Cola Philippines-FEMSA, Kraut Art Glass, Manuel Misa at Atty. Antonio Cablitas.
Makakalaban ni Tierro sa Final Four ang magwawagi kina top seed Jeson Patrombon at Filipino-Italian Marc Anthony Reyes.
Pinamunuan naman nina two-time champion Clarice Patrimonio at four-time titlist Marian Jade Capadocia ang mga umusad sa semis sa ladies’ singles.
Blinangko ni Patrimonio si Jhastine Red Ballado, 6-0, 6-0 habang inilampaso naman ni Capadocia si Sydney Ezra Enriquez, 6-0, 6-0.
Lalarga sa semis si Patrimonio kontra kay No. 4 Shaira Rivera na nagwagi kay Rachelle De Guzman, 7-6 (5), 7-5, samantalang makakalaban ni Capadocia si Akiko De Guzman na nanalo naman kay Khryzelle Sampaton, 6-4, 6-7 (0), 6-2.
- Latest
