Pirates diretso sa semis
Tumikada ng reversed layup si Flash Gordon Sadiwa (12) para makaiwas sa bantay na si CJ Perez ng Lyceum sa NCAA men’s basketball. (Jun Mendoza)
MANILA, Philippines — Tuloy ang ratsada ng Lyceum of the Philippines nang pabagsakin ang University of Perpetual Help System Dalta, 94-83 para masikwat ang unang Final Four slot sa NCAA Season 93 men’s basketball tournament kahapon sa The Arena sa San Juan City.
Nagsilbing lider ng mga pirata si CJ Perez nang humakot ito ng 21 puntos, siyam na assists, limang rebounds at dalawang steals habang matikas ang suportang ibinigay ni Mike Nzeusseu na may double-double na 15 puntos, 15 boards, isang assist at isang steal.
Ito ang ika-13 sunod na panalo ng Lyceum para mahablot ang tiket sa semis sa kauna-unahang pagkakataon sapul nang sumabak ito sa liga.
“Part of our journey is take it here. It’s something that we are not accustomed to. We have a vision to go through,” ani Pirates head coach Topex Robinson.
Malaki rin ang naitulong ng Marcelino twins na sina Jayvee at Jaycee na nagsanib-puwersa sa pagkolekta ng pinagsamang 26 puntos at pitong rebounds samantalang nagdagdag si Spencer Pretta ng 12 markers sa panig ng Pirates.
“Siguro nalilito sila (Perpetual Help) sa kanila (Marcelino twins) dahil kahit ako naguguluhan sa kanila kapag nandyan ang dalawa. They give us the opportunity that we need and they’re taking advantage of the opportunity given to them,” wika pa ni Robinson.
Nasayang ang pinaghirapang 26 puntos at 20 rebounds ni Prince Eze para sa Altas na gumulong sa 4-8 baraha na nagpalabo sa kanilang tsansang makahirit ng pwesto sa semis.
- Latest
