Bagong judges, referee sa Pac-Horn II

MANILA, Philippines - Mga bagong judges at referee ang mamamahala sa rematch nina Australian world welterweight titlist Jeff Horn at Filipino world eight-division champion Manny Pacquiao.

Ito ang sinabi ni Horn sa kanyang Instagram account kahapon bagama’t hindi pa opisyal na mangyayari ang kanilang rematch ni Pacquiao.

“As soon as the fight is confirmed, we will have all the information on p­ackages, ticketing and timings for you,” ani Horn.

Sa kanilang fight contract ay may nakasaad na rematch clause kung mananalo si Horn laban kay Pacquiao at ito ay idaraos lamang sa Australia.

Ginulpi ng 29-anyos na si Horn ang 38-anyos na si Pacquiao patungo sa kanyang unanimous decision victory para agawin sa Filipino boxing superstar ang suot nitong World Boxing Organization welterweight crown noong Hulyo 2.

Ang naturang ‘Battle of Brisbane’ ay pinanood ng 51,000 boxing fans sa Suncorp Stadium sa Brisbane, Australia.

Ayon kay Horn, dating school teacher sa Brisbane, gagawin ang kanilang ikalawang pagtutuos ni Pacquiao sa 13,500-seater na Brisbane Entertainment Center at tatawagin itong ‘Battle of Brisbane II’.

Sinabi ni Horn na i­nuulan na sila ng mensahe mula sa mga boxing fans tungkol sa petsa at lugar na pagdarausan ng kanilang rematch ni Pacquiao.

Maaaring gawin ang naturang Pacquiao-Horn II sa Nobyembre o sa kaagahan ng Disyembre.