Team Pacquiao dedma sa weight problem ni Horn
BRISBANE, Australia-- Hindi papansinin ng kampo ni Manny Pacquiao ang pagiging overweight ni Jeff Horn para sa kanilang nakatakdang laban bukas.
Sinabi ni assistant trainer Buboy Fernandez na maaaring ‘ploy’ lamang ang pahayag ni Horn na sobra ang kanyang timbang para sa welterweight limit.
“Ang labanan na ganyan, isa rin yan sa strategy,” wika ni Fernandez kahapon sa lobby ng Sofitel Hotel isang araw bago ang official weigh-in para sa WBO welterweight title fight.
“Sa tinagal-tagal na natin sa larangan ng boxing, alam na natin yan,” dagdag pa ng kababata ni Pacquiao.
Sa isang open workout noong Huwebes ay sinabi ni Horn na tumitimbang siya ng 70.3 kilos, o 155 pounds – walong pounds ang sobra sa welterweight limit.
Ayon sa 29-anyos na challenger, ang pagkuha niya sa weight limit ang tanging hadlang para sa kanyang inaasam na tagumpay.
Habang pinoproblema ng Brisbane native ang weight issues, inaasahan namang papasa si Pacquiao sa weigh-in.
Nakatakda ang official weigh-in ceremony ngayong alas-7 ng umaga sa Suncorp Stadium kung saan gagawin ang laban.
“Nasa 145 (pounds) lang tayo, wala tayong problema sa timbang,” wika ni Fernandez. “Wag natin intindhin kung overweight siya (Horn). So ang importante komportable tayo.”
- Latest