Kinsay mas sikit sa luwag
Nipasidaan si Presidente Rodrigo Duterte nga sa mosunod nga mga adlaw taktakon ang dugang mga opisyal sa iyang pamunoan nga gipasanginlan og kahiwian. Angay’ng magkuray sa kahadlok ang iyang mga tinudlo sa bag-ong mga lagda ni Duterte sa kampanya batok sa pangurakot:
• Iya dayong taktakon ang mga opisyal kun duna siyay matimahoan nga bisan gamay lang nga alisngaw sa kahiwian;
• Taktakon dayon ang mga opisyal nga gipasanginlan og kahiwian bisan wa pa ma-imbestigar ang mga pasangil; ug
• Taktakon gihapon niya ang gipasanginlang mga opisyal bisan di tinuod ang mga pasangil batok nila.
* * *
Ang bag-ong pasidaan giluwatan ni Duterte nga klarong natandog sa sibaw nga mga pagduda sa kamakiangayon sa iyang pagtaktak dayon ni kanhi DILG Secretary Mike Sueno. Kinsa wa mahilambigit sa bisan unsang kahiwian sa taas na niyang karera sa politika.
Ang pasidaan maoy nagsilbi niyang tubag sa kalibog ni Sueno nganong wa siya hatagi ni Duterte og kahigayonan sa pagpanalipod sa iyang kaugalingon gikan sa mga pasangil sa kahiwian. Posibleng mao say iyang katin-awan sa gibutyag ni Sueno nga padayong pagdumili ni Duterte pakigsulti niya human mapalagpot sa gabinete.
* * *
Ang kalaktod sa pagtaktak ni Sueno mas kahibulongan kun itandi sa kapaspas ni Duterte pagdupa sa uban niyang mga tinudlo:
• Gideklarar dayon niya nga di tinuod ang mga pasangil sa kahiwian batok ni Cesar Montano, ang iyang gitudlo nga chief operating officer sa Tourism Promotions Board, kay daghan og kuwarta ang aktor;
• Gisalikway niya ang paglambigit ni Justice Secretary Vitaliano Aguirre sa pagpangilkil sa negosyanteng si Jack Lam; ug
• Giisnab niyang mga pasangil sa pagpahimus ni Tourism Secretary Wanda Teo.
* * *
Mas masabtan hinuon ang nagkasungi nga mga lakang ni Duterte kun mangahas ta paghimo og mga lagda nga mahimong maoy gibasehan sa presidente pagsubli sa kasayuran batok sa iyang mga tinudlo:
• Di siya motuo sa mga pasangil kun ipaagi sa media, labi na sa media organizations nga iyang gibalikas;
• Labaw nang di motuo kun gikan sa iyang mga kaatbang;
• Motuo lang siya kun ang mga pasangil ipaagi sa iyang mga sinaligan; ug
• Taktakon lang ang pasanginlang mga opisyal, bisan suod pa niya, kun mas suod niya ang namasangil batok nila.
- Latest
