Mga silot sa imoralidad
Sa di pa manghagit si House Speaker Pantaleon Alvarez nga magpakiha sa iyang pamabaye uban ang pagsalig nga makapanalipod sa iyang kaugalingon kay kon ang pangabit himuong sukaranan sa disbarment pipila na lang ang mahibilin sa propesyon sa abogasiya, dapiton namo ang iyang atensiyon sa tulo ka susamang kaso:
•Imoralidad ang nakapasuspenso ni Gobernador Edgardo Tallado sa Camarines Norte;
•Pangabit ang nakapasuspenso ni Mayor Denny Refol sa Aklan; ug
•Pamabaye ang nakapahukas sa lisensiya sa usa ka abogado.
***
Si Tallado nabulilyaso human nanggawas sa social media ang hubo niyang mga letrato ug sex video uban sa babaye nga di iyang asawa niadtong 2014. Gipasanginlan ni Tallado ang nilayas niyang asawa nga maoy nagpakatap sa mga ebidensiya.
Bisan nagkauli silang Tallado ug iyang asawa, gipalagpot siya sa kadagkoan sa Liberal Party aron pagpatigbabaw sa kaligdong sa partido. Gisuspenso sab sa Ombudsman og unom ka buwan nga way suholan tungod sa "disgraceful and immoral conduct."
***
Unom ka buwan sang suspenso ni Mayor Refol nga nabistong nakapaanak og babaye nga di iyang asawa. Matod sa NBI wa itago sa mayor ang iyang pangabit gikan sa publiko. Gani nipirma sa certificate of live birth sa anak sa iyang kabit niadtong 2007.
Gisalikway sa Ombudsman ang duha ka depensa ni Refol: Gibuwagan na niyang babaye; ug pipila na lang ang mga opisyal sa gobyerno nga way kabit. Gipasabot sa Ombudsman unsay imoralidad: "An act which violates the basic norm of decency, morality and decorum, abhorred and condemned by the society and conduct which is willful, flagrant or shameless, and which shows a moral indifference to the opinions of the good and respectable members of the community."
***
Angay sang panaminan ni Alvarez ang pagmando sa Korte Suprema sa disbarment ni Atty. Ian Raymond Pangalangan sa Quezon City. Kinsa gipasanginlan nga nangabit ni bisan kinsang babaye ug nigamit sa iyang pagka abogado pagpahilom sa mga nangreklamo.
Nahukman siyang nakalapas sa Article 15, Section 2, sa 1987 Constitution: "Marriage, as an inviolable social institution, is the foundation of the family and shall be protected by the State" ug sa lagda sa mga abogado batok sa "unlawful, dishonest, immoral or deceitful conduct."
- Latest
