Grade 1 angol, usa patay sa bangga
CEBU, Philippines - Nabanggaan sa usa ka motorsiklo ang 6-anyos nga tinun-an dihang nilabang kini atbang sa ilang tunghaan sa Gairan, Bogo City niadtong Biyernes sa buntag nga niresulta sa pagkabali sa iyang wala nga paa.
Ang biktima giila nga si Rienier Andrino, grade 1, residente sa Barangay Gairan.
Padulong na pauli gikan sa eskwelahan ang bata ug kalit kining nilabang hinungdan nga naigo sa motorsiklo nga gimaneho ni Ryan Grant Jayme, 17, grade 10 nga tinun-an nga taga Cantecson, Barangay Gairan ug giingong walay lisensiya sa pagmaneho.
Iyang angkas sila si John Marven Quinatadcan, 15, taga Punta, San Remigio, ug Rocky John Tampus, 17, taga Cantecson, pulos nakaangkon og mga minor injuries.
Ang biktima dali nga gidala sa Provincial Hospital sa Bogo City ug gibalhin sa Dakbayan sa Sugbo.
Samtang kagahapon sa alas 3:45 sa buntag, ang angkas sa motor nga gimaneho ni John Paul Ybañez, 28, taga Lamintak, Medellin namatay human naparok sa semento sa Kalubihan, Don Pedro Rodriguez, Bogo City.
Matud ni Senior Police Officer 2 Conrado Estenzo sa Bogo City Police Station nga dunay padayon nga road widening sa maong dapit ug nibangga si Ybañez sa signage nga gibutang sa Department of Public Works and Highways.
Ang namatay giila nga si Garry Otid, 19, taga Lamintak ug nagsaulog pa sa iyang natawhan niadtong Biyernes.
Ang laing angkas mao si Rolie Lanorio, 39, residente gihapon sa Lamintak.
Matud ni Estenzo nga gikan ang tulo sa San Remigio padulong uli sa Medellin. Mylen P. Manto (BANAT NEWS)
- Latest
