Super disaster!

Lahi na gyud ang panahon karon, itandi kaniadto kun katalagman na ang hisgotan. Nisabay usab kini sa paglambo sa kinabuhi sa katawhan.

Kaniadto, ang bagyo kutob lang sa signal number 3, o panagsa moabot sa signal number 4 kun kusog na gyud. Apan karon may public storm signal number 5 na, o super typhoon category human miigo ang labing gamhanan nga bagyong Yolanda niadtong Nobiyembre 8, 2013.

Kaniadto dili kita pamilyar niining storm surge kon pagsaka sa tubig gumikan sa kusog nga paghuyop sa hangin mugna sa bagyo. Kagahapong adlawa mitugpa usab ang bagyong Lawin nga gihulagway sa PAGASA nga manghod lang og gamay ni Yolanda nga adunay gikusgon nga 225 ngadto sa 315 kilometros matag oras.

Bisan og walay direkta nga epekto si Lawin sa Kabisay-an apan dili kita angayan nga magmaya o magpasalamat, sanglit nakamugna man kini og kadaot sa atong kaigsoonan didto sa mga dapit sa Luzon nga gikuso kuso sa kabangis ni Lawin.

Dili man gyud kakompiyansahan ang mga katalagman apan mas kahadlokan ug angay’ng pangandaman natong tanan ang kabag-ohan sa gikusgon sa ilang kabangis nga atong matagamtaman.

Mismo ang mga weather experts kanunay nga nag-awhag sa mga ahensya sa kagamhanan ug sa local government units nga mohimo og mga pagpangandam aron makalikay kita sa grabeng kadaot kun adunay super typhoon nga moigo sa nasud.

Sa lalawigan sa Sugbo, subsob ang mga pagbansay-bansay ug seminar nga gihimo sa mga local government units kalabot sa disaster preparedness. Apan kumusta man ang atong mga estraktura?

Andam na ba kini kun simbako lang makasinati kita og susama kakusog nilang Lawin ug Yolanda? Dili lang bagyo ang nilambo, apil na ang pagtay-og sa yuta sama sa 7.2 magnitude earthquake niadtong 2013.

May moabot pa ra ba kuno nga giingon nila nga "the big one."

Andam na ba gyud kita sa mga super disaster? Basin kutob lang sa preparasyon ha?