2 pang laban kay Pacman sa 2017 - Arum
MANILA, Philippines – Matapos ang comeback fight ni Manny Pacquiao kay world welterweight king Jessie Vargas ay dalawang laban pa sa 2017 ang nakatakdang ilinya ni Bob Arum ng Top Rank Promotions para sa Senador.
Sa panayam ng BoxingScene.com, sinabi ni Arum na kumpiyansa siyang mapagsasabay ni Pacquiao ang kanyang pagte-training at ang trabaho sa Senado.
“I don’t know how extensive the work is as a Senator in the Philippines. Manny does, the other Senators do, they all feel and Manny fells that he can train in Manila and not miss any sessions,” wika ni Arum.
Nakatakdang labanan ni Pacquiao (58-6-2, 38 KOs) si Vargas (27-1-0, 10 KOs) sa Nobyembre 5 sa Thomas & Mack Center sa Las Vegas, Nevada.
Tatangkain ng 37-anyos na si Pacquiao na agawin sa 27-anyos na si Vargas ang suot nitong World Boxing Organization welterweight crown.
Ang nag-iisang kabiguan ni Vargas ay mula sa mga kamao ni Timothy Bradley Jr. sa kanilang paghaharap noong Hunyo ng nakaraang taon.
Sakaling manalo kay Vargas ay dalawang laban ang ihahanda ng 84-anyos na si Arum para kay Pacquiao sa susunod na taon kung saan maaari na itong tuluyang magretiro.
“If he wins this fight, we have the idea for a couple of big fights next year,” wika ni Arum kay Pacquiao. “And I think that will end his career with two more fights in 2017.”
- Latest
