Champion ang Phoenix Tanduay sinilat sa game 3
MANILA, Philippines - Hindi na hinayaan pa ng Phoenix na makawala sa kanilang palad ang kampeonato nang itarak nito ang 87-78 panalo laban sa Tanduay sa rubber match upang pagharian ang PBA D-League Foundation Cup kagabi sa Alonte Sports Arena sa Biñan, Laguna.
Pinatunayan ni Conference Most Valuable Player Mike Tolomia na karapat-dapat ito sa kanyang nakamit na parangal matapos humakot ng 21 puntos, pitong rebounds at apat na assists para pamunuan ang Accelerators.
“Sanay na kami sa mga ganitong laro na maaga kami lumalamang pero nahahabol kami. Ang maganda lang sa team, mabilis kami nakakabalik dahil tulung-tulong kami para maibalik yung momentum and eventually makuha yung panalo,” wika ni Tolomia.
Mabangis din si Mac Belo na may double-double na 14 markers at 10 boards habang nagparamdam din ng lakas si dating University of Santo Tomas standout Ed Daquioag na sumakmal ng 10 puntos at limang assists.
“Basta nag-stay together lang kami as a team sa defense and kahit nag-struggle kami offensively, basta sama-sama kami, kaya naming manalo,” dagdag pa ni Tolomia.
Ito ang ikalawang sunod na korona ng Accelerators matapos mamayagpag sa Aspirants’ Cup noong Abril.
Ang Phoenix ang ikalawang koponan sa liga na nakuha ang Aspirants’ Cup at Foundation Cup matapos itong makuha maisakatuparan ng NLEX Road Warriors ng dalawang beses.
Nanguna para sa Rhum Masters si Jaymo Eguilos na nagposte ng 16 puntos at anim na rebounds samantalang nagdagdag si Reden Celda ng 14 markers at pitong boards.
Tinapos ng Accelerators ang best-of-three championship series hawak ang 2-1 rekord.
Nanaig ang Phoenix sa Game 1 sa bendisyon ng 84-76 panalo bago naitabla ng Rhum Masters ang serye bunsod ng 89-75 panalo sa Game 2.
PHOENIX 87 - Tolomia 21, Belo 14, Daquioag 10, Escoto 9, Jose 9, Andrada 6, Mendoza 6, Inigo 5, Pogoy 4, Tamsi 3, Colina 0.
TANDUAY 78 - Eguilos 16, Celda 14, Acuna 13, Alolino 13, Lingganay 10, Ferrer 7, Belencion 3, Gotladera 2, Javillonar 0, Mendoza 0, Santos 0, Tagarda 0.
Quarters: 32-17, 48-34, 65-56, 87-78.
- Latest
