Saguiguit, Tobias tinapik ng Perpetual

MANILA, Philippines - Dalawang beteranong coaches ang kinuha ng University of Perpetual Help System Dalta upang hawakan ang Junior Altas sa National Collegiate Athletics Association (NCAA) Season 92 basketball season.

Mamanduhan nina Olivares College Sea Lions coach Mike Saguiguit at dating Arellano Chiefs assistant coach Barry Tobias ang Perpetual Help na nagnanais makabalik sa Final Four ng liga.

Huling nalasap ng Junior Altas ang pagpasok sa semis noong pang Season 86 noong 2010 sa ilalim ni coach Tonichi Pujante. Naglalaro pa noon para sa Perpetual Help sina Gelo Alolino, Flash Sadiwa, Mark Bitoy at Joel Brito.

Kaya’t nais ng Perpetual Help na maibahagi nina Saguiguit at Tobias ang kanilang winning attitude sa Junior Altas.

Dinala ni Saguiguit ang Olivares College sa kampeonato sa NCRAA at UCAA habang si Tobias ang assistant coach ni Jerry Cordiñera sa Arellano.

Sasandal ang Junior Altas kina Jasper Cuevas, Lance De Leon, Jielo Razon, Errol Bongoy, Justine  Desquitado at Rob Mendoza na siyang nagpasiklab sa Fr. Martin’s Cup noong summer.

Unang makakasagupa ng Perpetual Help ang Arellano Junior Chiefs sa Lunes sa The Arena sa San Juan City. (CCo)