SBP maninigurado bago isabak si Blatche sa OQT
MANILA, Philippines – Titiyakin ng Samahang Basketbol ng Pilipinas (SBP) na nasa tamang porma si naturalized player Andray Blatche bago sumabak sa FIBA Olympic Qualifying Tournament sa Hulyo 5 hanggang 10 na gaganapin sa Mall of Asia Arena sa Pasay City.
Nakatakdang dumating si Blatche sa Mayo 15 upang makasama ang iba pang miyembro ng Gilas Pilipinas sa training camp.
Inatasan ng SBP si Christopher Thomas na bantayan ang kundisyon ni Blatche.
Isang espesyal na programa ang ibibigay ni Thomas kay Blatche para masiguro na handang-handa ito sa usaping pisikal at mental para sa Olympic qualifiers.
Magugunitang wala sa porma si Blatche nang maglaro ito sa FIBA Asia Championship na ginanap sa Changsha, China noong nakaraang taon.
Mayroon lamang itong average na 17.8 points, 9.2 rebounds at 1.2 assists sa naturang torneo ngunit nagawa pa rin ng Gilas Pilipinas na makuha ang runner-up trophy sa likod ng nagkampeong Chinese squad.
Bahagyang malayo ito sa kanyang 21.1 points, 13.8 rebounds at 1.6 assists noong 2014 nang maglaro ang Pilipinas sa FIBA World Cup sa Spain.
Huling naglaro si Blatche noong Pebrero 3 para sa Xinjiang Flying Tigers sa Chinese basketball league kung saan mayroon itong average na 23.3 points, 10.4 rebounds at 4.0 assists - isang magandang indikasyon na nasa magandang estado ang dating NBA player.
Makakasama ni Blatche sa training camp sina Matt Ganuelas-Rosser, Ranidel de Ocampo, Ryan Reyes,Moala Tautuaa, Jayson Castro, Troy Rosario, LA Tenorio, Greg Slaughter, Japeth Aguilar, Marcio Lassiter, June Mar Fajardo, Gabe Norwood, Jeff Chan, Paul Lee, Calvin Abueva, Terrence Romeo, Marc Pingris, Kiefer Ravena, Kevin Ferrer, Mac Belo, Roger Pogoy, Russell Escoto at Bobby Ray Parks Jr.
Pakay ng Gilas Pilipinas na makahirit ng tiket sa 2016 Olympic Games na gaganapin sa Rio de Janeiro, Brazil sa Agosto.
Tanging ang magkakampeon lamang sa Manila Olympic Qualifying ang mabibiyayaan ng silya sa Rio Olympics.
- Latest
