Arum ‘di naniniwalang magreretiro si Pacman sa Abril 9
MANILA, Philippines - Nauna nang sinabi ni Manny Pacquiao na matapos ang kanilang pangatlong upakan ni world welterweight titlist Timothy Bradley Jr. sa Abril 9 ay tuluyan na niyang wawakasan ang kanyang makulay na boxing career para sumuong sa pulitika.
Sa kabila ng naturang pahayag ng Filipino world eight-division champion ay may ilan pa ring hindi naniniwala na mangyayari ito.
Isa na rito si Bob Arum ng Top Rank Promotions.
“I’ve been promoting boxing 50 years; time after time fighters have said to me that they were retiring only to unretired,” ani Arum sa panayam ng ABS-CBN North America News Bureau.
Sa ikatlong pagkakataon ay lalabanan ng 37-anyos na si Pacquiao ang 33-anyos na si Bradley sa Abril 9 sa MGM Grand sa Las Vegas, Nevada.
Dahil isinuko ni Bradley ang kanyang dating suot na World Boxing Organization welterweight crown ay walang makukuhang titulo si Pacquiao kahit na muli niyang talunin ang American fighter sa ikalawang sunod na pagkakataon.
“If Manny wants to retire after this fight, it’s certainly up to him and I would applaud it but I’m not counting on that happening,” ani Arum na inihahanda si WBO light welterweight king Terence Crawford sakaling magbago ang isip ni Pacquiao.
Nauna nang sinimulan ni Pacquiao ang kanyang pagpapakondisyon sa GenSan kung saan inaasahan siyang sasamahan ni chief trainer Freddie Roach.
Inihanda na ni Roach bilang mga sparring partners ni Pacquiao sina Frankie Gomez (20-0-0, 13 KOs) at super lightweight Jose Ramirez (16-0-0, 12 KOs).
- Latest