Pelicans tambak sa Thunder

MANILA, Philippines - Naglaro ang Oklahoma City at ang New Orleans na mabigat ang mga damdamin.

Ang pagkamatay ni Ingrid Williams, asawa ni Thunder assistant coach Monty Williams, ay lubhang nakaapekto sa dalawang prangkisa.

Si Monty Williams ay naging Pelicans head coach bago sinibak sa nakaraang season at naging malapit sa mga players.

Ngunit ayaw gamitin ni Pelicans center Anthony Davis ang trahedya sa kanilang 95-121 kabiguan sa Thunder sa Chesapeake Energy Arena.

“It was tough, but you have to still go out there and compete,” sabi ni Davis. “That’s what we tried to do tonight.”

Isang rebound lamang ang kulang kay Thunder guard Russell Westbrook para maiposte ang kanyang pang-siyam na triple double sa season matapos magtala ng 23 points, 10 assists at 9 boards.

Umiskor naman si forward Kevin Durant  ng 23 points mula sa 10-of-17 fieldgoal shooting bukod pa sa 6 assists, habang nagdagdag si Serge Ibaka ng 18 points para sa Thunder na itinaas ang kanilang record sa 40-14.

Papasok ang Oklahoma City sa All-Star break bilang isa sa tatlong koponan sa Western Conference na may 40 wins.

Ayon sa Elias Sports, ito ang unang pagkakataon sa NBA history na nangyari ito sa anumang conference.

“I think we are great, man,” wika ni Westbrook. “Forty wins, I like where we are. Looking to come back in the second half of the season and turn it up a notch.”

Kinuha ng Oklahoma City ang 62-53 abante sa halftime at pinalobo sa 95-74 patungo sa fourth quarter.

Tumapos si Davis na may 23 points para pamunuan ang Pelicans, ngunit nalimitahan sa  3 rebounds, habang umiskor din si guard Jrue Holiday ng 23 points at 6 assists.

Sa iba pang laro, tinalo ng Milwaukee Bucks ang Washington Wizards, 99-92.