Undefeated welterweight at US Olympian tinapik ni Roach na ka-spar ni Pacquiao

MANILA, Philippines – Talagang seryoso si chief trainer Freddie Roach na magkaroon si Manny Pacquiao ng mabigat na training camp sa kabila ng pagsisimula ng political campaign ng Filipino world eight-division champion.

Isang undefeated welterweight at US Olympian ang kinuha ni Roach para maging sparrmates ni Pacquiao sa paghahanda kay Timothy Bradley, Jr.

Inaasahan ni Roach na kaagad magtutungo si Frankie Gomez, nagdadala ng malinis na 20-0-0 win-loss-draw ring record kasama ang 13 KOs, sa Pilipinas sa sandaling makumpleto nito ang kanyang travel papers.

“It depends on how fast Top Rank can prepare Gomez’s travel documents,” sabi ng trainer sa panayam ng Philboxing.com.

“He (Gomez)’s definitely coming in time for the start of the sparring sessions two weeks after I arrive. They  (Top Rank) are already wor-king on his papers,” dagdag pa ng trainer sa 24-anyos na tubong East Los Angeles, California na kanyang hina­wakan simula noong 2010.

Nakatakda namang dumating sa bansa si Roach bukas para pangunahan ang pag-eensayo ni Pacquiao, lalabanan si Bradley sa ikatlong pagkakataon sa Abril 9 sa MGM Grand sa Las Vegas, Nevada.

Sinasabing ito ang magiging pinakahuling laban na gagawin ng 37-anyos na si ‘Pacman’ bago tuluyang magretiro para tutukan ang kanyang kandidatura sa isang silya sa Senado.

Nakatakda ring duma-ting sa bansa si super lightweight Jose Ramirez (16-0-0, 12 KOs) para maging sparmate ni Pacquiao.

Si Ramirez ay isang US Olympian at kasalukuyang North American Boxing Fe-deration super lightweight titlist.