Gasol bumandera sa panalo ng Bulls
CHICAGO – Malusog at komportable na si center Pau Gasol.
Sinabi rin ng 34-anyos na veteran makakatalon siya ng mas mataas matapos ang kanyang problema sa tuhod.
At tila maganda ang kanyang season para sa Chicago Bulls.
Humakot si Gasol ng 29 points, 16 rebounds at 5 blocked shots para banderahan ang Bulls sa 109-104 overtime win laban sa Boston Celtics.
“The last couple years, I had issues with my knees. I couldn’t really jump as much as I’m jumping now,” wika ni Gasol, naglista ng career-high na 9 blocked shots sa nauna niyang laro. “Not that I’m jumping super high, maybe an inch more.”
Ito ang ika-17 double-double ni Gasol sa una niyang season para sa Bulls.
Nagdagdag si Aaron Brooks ng 19 points para sa Bulls (24-10) na naipanalo ang siyam sa kanilang huling 10 laban.
Umiskor naman sina Taj Gibson at Derrick Rose ng tig-12 points.
Humugot si Evan Turner ng 24 sa kanyang 29 points matapos ang halftime, ngunit nalasap pa rin ng Boston ang 2-6 record matapos ibigay si Rajon Rondo sa Dallas noong Disyembre 18.
Nagtala si Avery Bradley ng 17 points para sa Celtics (11-20).
Naglaro ang Bulls nang wala sina starters Jimmy Butler (bereavement leave) at Mike Dunleavy (right ankle).
Ang agaw ni Rose ang nagresulta sa basket ni Gasol para sa 103-99 abante ng Chicago sa 2:21 minuto sa overtime.
Ang dalawang free throws ni Gasol at layup ni Rose ang nagbigay sa Bulls ng 107-103 abante sa huling 24.8 segundo.
Sa Houston, gumawa si James Harden ng 28 points, habang may 23 si Dwight Howard para tulungan ang Rockets sa 115-79 paggupo sa Miami Heat.
Sa Portland, tumipa si Paul Millsap ng 27 points para pamunuan ang Atlanta Hawks sa 115-107 panalo laban sa Trail Blazers.
Ito ang ikaapat na sunod na ratsada ng Hawks.
Nag-ambag si Jeff Teague ng 22 points para sa Atlanta na may 11-5 record sa kanilang mga road games.
Sa San Antonio, kumamada si Cory Joseph ng 19 points at nalampasan ng Spurs ang maagang ratsada ng Wizards, 101-92, para sa kanilang ika-17 sunod na pagdomina sa Washington.
Nagdagdag si Tiago Splitter ng 16 points, habang may 15 si Patty Mills at 14 si Boris Diaw para sa pamamayagpag ng mga role players ng San Antonio.
Tumapos si Manu Ginobili na may 5 points kasunod ang 4 markers ni center Tim Duncan.
- Latest