Adunay shabu lab sa Sugbo?
CEBU, Philippines - Dako ang pagtuo sa labaw’ng opisyal sa Philippine Drug Enforcement Agency kon PDEA-7 nga adunay shabu laboratory dinhi sa Sugbo gumikan sa daghan gihapong suplay sa maong ilegal nga drugas.
Si PDEA-7 regional director Yogi Filemon Ruiz, nagtuo nga adunay shabu lab sa Sugbo kay kanunay ang ilang gipahigayong operasyon batok niini diin minilyon ang kantidad sa ilang nasakmit apan padayon ug daghan gihapong shabu ang ilang makumpiskar.
Sumala pa ni Ruiz nga posibleng walay kahadlok kanila ang mga drug lord kay anaa man gihapon ang suplay bisan og kanunay ang ilang gipahigayon nga drug operations.
Pipila ka tuig ang nilabay, nasakpan sa mga tinugyanan sa balaod ang usa ka shabu laboratory nga nag-operate sulod sa usa ka dakong bodega diha sa dakbayan sa Mandaue nga gipasiugdahan sa mga Insik ug pipila ka Filipino.
Gitug-an ni Ruiz nga may team na sila karon nga nag-monitor ug nagsusi sa posibleng presensiya sa shabu laboratory dinhi sa Sugbo. Nunot niini magpadayon gihapon ang ilang kampanya batok sa ilegal nga drugas.
Ang PDEA mao ang lead agency sa pakigbatok sa ilegal nga drugas. Rowena D. Capistrano (BANAT NEWS)
- Latest
